Ázerbaıjan 2025 jyly qorǵanysqa bólinetin qarajatty ulǵaıtpaq

<p>ASTANA. KAZINFORM &ndash; Ázerbaıjan 2025 jylǵa arnalǵan memlekettik bıýdjette qorǵanys pen ulttyq qaýipsizdikke jumsalatyn qarajat mólsherin ulǵaıtýdy kózdep otyr.</p>

«Bul qadamdar áskerı áleýetti arttyrý qajettiligine baılanysty jáne Armenııanyń mılıtarızatsııasyna jaýap retinde jasalynbaq», - dedi Ázerbaıjannyń qarjy mınıstri Samır Sharıfov parlamenttiń ekonomıkalyq saıasat jónindegi otyrysynda sóılegen sózinde.

Onyń aıtýynsha, 2025 jylǵa arnalǵan bıýdjet jobasynda qorǵanys pen ulttyq qaýipsizdikke jalpy memlekettik shyǵystardyń 20,3 paıyzy nemese 8,396 mlrd manat (4,94 mlrd dollar) bólingen. Bul 2024 jylǵa boljamnan 1,27 mlrd manat (747 mln dollar) nemese 17,8%-ǵa, al 2023 jyly jasalǵan boljamnan 2,542 mlrd manat (1,495 mlrd dollar) nemese 43,4%-ǵa artyq. 

«Ázerbaıjannyń qorǵanysy men ulttyq qaýipsizdigin nyǵaıtý, áskerı qurylysty modernızatsııalaý shyǵyndaryna baılanysty qarajat kólemi osynshama ulǵaıdy», - dedi Samır Sharıfov. 

2025 jylǵa arnalǵan bıýdjet shyǵystarynda qarýly kúshterge 2 mlrd 665,2 mln manat (1 mlrd 567 mln dollar), ulttyq qaýipsizdikke 467 mln 917 myń manat (275,245 mln dollar), shekara qyzmetine 540 mln 314 myń manat (317,831 mln dollar) bólingen.