«Azbýka jılıa» úleskerleri sot úkimine qanaǵattanbaı otyr

ASTANA. QazAqparat - Búgin Astana qalasynda «Azbýka jılıa» qurylys kompanııalary tobynyń basshylarynyń áreketinen zardap shekken «Aısanam», «Aısanam de lıýks», «Komsomolskıı», «ExpoCity», «ExpoTown», «Komfort», «Garant», «Jeti Jol», «Sadovye kvartaly» jáne «Dınastııa» turǵyn úı keshenderiniń úleskerleri Elbasy Nursultan Nazarbaevtan úleskerlik jáne ınvestıtsııalyq-úleskerlik nysandardy aıaqtaýǵa qarjylyq kómek surap, konferentsııa uıymdastyrdy, dep habarlaıdy «QazAqparat» tilshisi.

Uıymdastyrýshylardyń aıtýynsha, konferentsııanyń basty maqsaty -aıaqtalmaǵan turǵyn úı máselesine bılik ókilderiniń kóńilin aýdartý.

Úleskerler «Azbýka jılıa» kompanııasynyń basshylyǵyna qatysty sot úkimine qanaǵattanbaı otyr.

«Sot úkimimen «Azbýka jılıanyń» tárkilengen dúnıe-múlki men aktıvteri de satylyp qurylysqa salynady dep aıtyldy. Top menedjerler sottaldy. Biz bul sheshimge qanaǵattanbaımyz. Sebebi, basty qylmyskerler jazasyn almady», - dedi «Aısanam de lıýks» turǵyn úı-qurylys kooperatıviniń tóraǵasy Murat Qasenov.

Onyń aıtýynsha, tyıym salynǵan dúnıeler týraly aqparat qylmystyq is barysynda tekserilýi kerek bolǵan. Biraq, ol týraly málimet berilmegen. Onyń ústine irgetasy qalanǵan 9 keshendi turǵyzyp bitirý úshin 20 mıllıard teńge kerek. Al bir ǵana «Aısanamdy» bitirý úshin 5 mlrd teńge júmsalady.

«Azbýka jılıanyń» 18 iri kompanııasynyń úlesi Samat Ordabaı degen jeke tulǵanyń atyna ótken. Prokýratýraǵa baryp, advokattyq suraý joldaǵanda anyqtalǵandaı, 2016 jyldyń 21 qyrkúıek kúni Quralbaı Shámshi degen kisige satylǵan. Bul másele boıynsha da Bas prokýratýraǵa shaǵymdandyq. Úkimettiń №1039 qaýlysyna sáıkes, memleketten qarjylyq kómek surap otyrmyz. Osy máseleniń negizgi fıgýranty Erqanat Taıjanovtyń otbasy músheleri men baýyrlarynyń jeke múlkin tekseristen ótkizip, tárkilenýin suraımyz. Sondaı-aq, tárkilengen aktıvterdi memleket ózine qaıtaryp alyp, esesine 4 myńǵa jýyq úleskerdiń páterleri memlekettiń aralasýymen qoldanysqa berilýin qalaımyz», - dedi ol.

Eske sala keteıik, Astana qalasy Almaty aýdandyq №2 sotynyń 2016 jylǵy 28 qarashadaǵy úkimimen «Azbýka jılıa» kompanııasynyń top-menedjerleri «Jeti-Jol», «Garant», «Komsomolskıı», «Sadovye kvartaly», «Ekspo Sıtı», «Expo Town», «Aısanam De Luxe», «Komfort De Luxe», «Dınastııa» turǵyn úı keshenderi úleskerleriniń aqshalaı qarajatyn jymqyryp, qylmys jasaýda aıypty dep tanyldy jáne túrli jazalaý sharalaryna kesilgen edi.