«Azbýka jılıa» kompanııasynyń burynǵy basshysy qamaýda otyrǵan joq - Bas prokýror
«Taıjanov boıynsha Avstrııamen kelissózder júrgizip jatyrmyz. Osy rette bul eldiń quqyq qorǵaý organdarymen tıisti jumystar atqarylýda. Bizde tergelgen isti atalǵan elge tapsyrýymyz kerek. Sondyqtan da jaqyn arada bizdiń suraýdy qanaǵattandyrady dep úmittenemin. Olarda rásimder óte uzaq jasalady. Atap aıtqanda, osy elmen ortaq mámilege kelip, Avstrııada qýdalaý qamtamasyz etilýi úshin qylmystyq istiń materıaldaryn tapsyramyz dep oılaımyn», - dep atap ótti Asanov Májilistegi jalpy otyrys barasynda tilshiler saýalyna jaýap bere otyryp.
Sonymen qatar ol búginde Taıjanov qamaýda otyrmaǵanyn jetkizdi.
«Ol qamaýda otyrǵan joq. Atalǵan eldiń quqyq qorǵaý organdary bizden qylmystyq istiń materıaldaryn kútip otyr», - dedi QR Bas prokýrory.
Aıta keteıik, Avstrııanyń quqyq qorǵaý organdarymen birlesken jedel izdestirý sharalary barysynda senip tapsyrylǵan múlikti ıemdenýi jáne talan-tarajǵa salǵany úshin Qazaqstan ІІM Interpol Ulttyq ortalyq bıýrosy halyqaralyq izdeý jarııalaǵan Erqanat Sharapatuly Taıjanov 2016 jyly 13 mamyrda Avstrııada ustaldy. Taıjanov 2012-2015 jyldary aralyǵynda «Azbýka jılıa» kompanııalar tobynyń naqty ıesi bola turyp, úleskerlerdiń 40 mlrd teńgeden astam qarjysyn zańsyz ıemdengen.
«Azbýka jılıa» qurylys kompanııalary tobynyń basshylarynan «Aısanam», «Aısanam de lıýks», «Komsomolskıı», «ExpoCity», «ExpoTown», «Komfort», «Garant», «Jeti Jol», «Sadovye kvartaly» jáne «Dınastııa» turǵyn úı keshenderiniń úleskerleri zardap shekti.