Azattyq bizge ońaılyqpen kelgen joq - Álı Bektaev
«El Prezıdenti Qasym-Jomart Toqavtyń «Táýelsizdik bárinen qymbat» atty maqalasyn oqyp shyǵyp, egemendigimizdi, memlekettigimizdi nyǵaıtý úshin ne isteýimiz kerek degen saýalǵa jaýap aldyq. Otyz jylda elimiz memlekettik nyshandaryn belgilep, bılik júıesin qalyptastyrdy, ulttyq valıýtamyz aınalymǵa endi, Qarýly Kúshterimiz quryldy, Ata zańymyz qabyldandy, shekaramyz shegendeldi, elimiz bedeldi halyqaralyq uıymdarǵa múshe boldy. Bir sózben aıtqanda, Qazaq eli ulttyq salt-dástúrin, tilin, dinin, dilin jańǵyrtyp, ósip-órkendep, mereıli memleketke aınaldyq.
Osynaý tolaǵaı tabystardyń bárinde Elbasynyń dara kóshbasshylyǵy men halqymyzdyń danalyǵy men parasaty, birligi men yntymaǵy, otandastarymyzdyń qajyrly eńbegi jatqanyn atap ótti. «Sondyqtan, Elbasy Táýelsizdigimizdiń máńgi sımvolyna aınaldy desek, aqıqatty aıtqan bolar edik» dep tuǵyrly tulǵanyń el tarıhynda alar ornyn aıqyndap berdi» - dedi senator.
Onyń sózine qapaǵanda, Memleket basshysy aldaǵy on jyldaǵy mindet – qýatty eldiń ıesi jáne kemel halyq bolý ekenin basa aıtty. Bul jolda saıası-ekonomıkalyq reformalardy jáne sanany jańǵyrtý úderisin jalǵastyryp, zaman talabyna beıimdelgen ulttyń jańa bolmysyn qalyptastyrýymyz qajet. Ult pen el retinde saqtalyp qalý úshin búgingi jáne bolashaq urpaq jańa syn-qaterlerge daıyn bolýy kerek. Ol úshin óskeleń urpaq Táýelsizdiktiń qadirin bilýi qajet. Azattyq bizge ońaılyqpen kelgen joq. Táýelsizdik taǵdyrdyń bere salǵan syıy emes. Túptep kelgende, qazaqtyń tarıhy – azattyq jolyndaǵy kúreske toly tarıh. Táýelsizdikke qol jetkizý ǵana emes, ony ustap turýdyń áldeqaıda qıyn ekendigine memleketterdiń tarıhtary dálel.
«Sonymen qosa, el Prezıdenti óziniń maqalasynda mańyzdy tapsyrma júktedi, ol – Qazaqstannyń akademııalyq úlgidegi jańa tarıhyn jazýdy dereý bastaý. Ol úshin talaı aqtańdaqtardyń betin ashyp, burmalanyp kelgen derekterdi túzetý qajet. Bul iske elimizdiń eń myqty tarıhshylary tartylmaq. Sonymen qatar, Qazaqstannyń qysqasha tarıhy álemniń negizgi tilderine aýdarylatyn bolady. Memleket basshysy osy maqalasynda Qazaqstannyń egemendigine, aýmaǵynyń tutastyǵyna kúmán keltirýshi jat nıetti saıasatkerlerdiń arandatýshylyq sandyraq áńgimelerine naqty jaýap qaıtardy.
Qazaq úshin ejelden Jer, Til, El birligi – eń qasterli uǵymdar deıtin bolsaq, Memleket basshysy osynaý maqalada: «Jerge baılanysty bárimiz aıqyn biletin jáne buljymaıtyn aqıqat – qazaqtyń jeri eshbir sheteldiktiń menshigine berilmeıdi, eshqashan satylmaıdy. Osyny ár azamatymyz sanasyna berik sińirýi qajet. Kelesi jyly Jer kodeksiniń jekelegen normalaryna qatysty engizilgen moratorııdiń merzimi aıaqtalady. Aýyl sharýashylyǵy maqsatyndaǵy jerlerdi aınalymǵa engizip, halyqtyń ıgiligine jaratý – óte mańyzdy másele. Sondyqtan, bıyl Jer máselesi jónindegi komıssııany quryp, sonyń aıasynda bir baılamǵa kelgen jón. Qazaq úshin toqymdaı jerdiń ózi qymbat, bir ýys topyraqtyń ózi altyn», - dep qadap aıtyp, nyq senimde bolý kerektigin uǵyndyrdy», - dedi depýtat.
Sonymen qatar Á Bektaev Prezıdent qazaq tiliniń mártebesi jaıynda da sóz qozǵaǵanyn eske saldy. Memlekettik tildi bilý – Qazaqstannyń árbir azamatynyń paryzy dep te aıtýǵa bolady. Osy oraıda barsha qazaqstandyqtarǵa, onyń ishinde qazaq tilin áli jete meńgermegen otandastarymyzǵa úndeý tastady.
«Sońǵy kezde qazaqstandyqtar qoǵamdyq ómirge, saıası úderisterge belsendi aralasyp keledi. Prezıdenttiń «Halyq únine qulaq asatyn memleket» tujyrymdamasy men Ulttyq qoǵamdyq senim keńesi – osynyń aıǵaǵy. Salıqaly saıası reformalar Qazaqstannyń saıası júıesi zaman talabyna saı damyp kele jatqandyǵyn kórsetedi», - dedi senator.
«Rasynda da, Táýelsiz el bolý ony jarııalaýmen shektelmeıdi. Táýelsizdik úshin naǵyz kúres kúndelikti eńbekpen, úzdiksiz ári dáıekti eldik saıasatpen máńgi jalǵasady. Memleket basshysy aıtqandaı, biz qýatty táýelsiz memleketimizben ǵana ult retinde jer betinde saqtalamyz. Memleket basshysynyń búgingi oı tolǵanysy meni tereńnen terbedi. Búginimizdiń bekem, keleshegimizdiń kemel bolatynyna bek senimdimin», - dedi Álı Bektaev.