«Azat shańyraǵy» PIK-tiń burynǵy tóraǵasy Qaıyrly Omar eki jylǵa sottaldy

NUR-SULTAN. QazAqparat – «Azat shańyraǵy» jeke páter ıeleri kooperatıviniń burynǵy tóraǵasy Qaıyrly Omar eki jylǵa bas bostandyǵynan aıyryldy, dep habarlaıdy QazAqparat Nur-Sultan qalalyq sotynyń saıtyna silteme jasap.

Sotqa deıingi tergeý organy Qaıyrly Omarǵa QR QK-niń 189baby 4-bóligi 2-tarmaǵyna sáıkes (Senip tapsyrylǵan bóten múlikti ıemdenip alý nemese talan-tarajǵa salý) 12 mıllıon teńgeden astam qarajatty jymqyrdy dep aıyp taqty.

«Sottyń isti qaraýy kezinde aıyptaýshy tarap Qaıyrly Omardyń atalmysh árekettik jasaýyna jetkilikti dálel keltire almady. Sot jeke tergeý amaldaryn, atap aıtqanda, tintý jáne qaraý hattamalaryn, sot-ekonomıkalyq saraptama qorytyndysyn jaramaıtyn dálelder qataryna jatqyzdy. Olar qylmystyq-protsessýaldyq zańǵa qaıshy túrde alynǵan dep tanyldy», delingen habarlamada.

Sot tek «Azat shańyraǵy» jeke páter ıeleri kooperatıviniń ıeleri bolyp tabylmaıtyn tulǵalardan zańsyz túrde qosymsha aqsha jınaý deregin anyqtady. Osyǵan baılanysty Q.M.Omardyń is-áreketin aıyptaý baby QR QK-niń 250-baby 1-bóligine («ókilettikti teris paıdalaný») ózgertildi.

«Nur-Sultan qalasynyń №2 Saryarqa aýdandyq soty Qaıyrly Omardy QR QK-niń 250-baby 1-bóligi boıynsha aıypty dep tanyp, 2 jylǵa bas bostandyǵynan aıyrdy. Ol jazasyn qaýipsizdigi tómen qylmystyq-atqarý júıesi mekemesinde óteıtin bolady», delingen úkimde.

Sot sheshimi zańdy kúshine engen joq.