Azat Perýashev Prezıdent saılaýyna kandıdat retinde nege qatyspaıtynyn aıtty

ASTANA. QazAqparat – «Aq jol» demokratııalyq partııasynyń tóraǵasy Azat Perýashev Prezıdent saılaýyna nege qatyspaıtynyn aıtty, dep habarlaıdy QazAqparat tilshisi.

«Tóraǵa nege saılaýǵa túspeıdi degen suraqtar qoıyldy. Mundaı usynys túsken. Keshe keńeste aıttym. Biraq men úshin eń alǵashqy orynda ózimniń jeke ambıtsııalarym emes, elimizge qyzmet etý degen uǵym bar. Óz ambıtsııamdy aldaǵy ýaqytta iske asyra jatarmyn», - dedi Azat Perýashev partııanyń kezekten tys HІH sezinde.

A. Perýashev «Partııa quramynda halyqaralyq deńgeıge shyǵa alatyn, saıası mansaby kóńilden shyǵatyn azamattar bar ma?» degen suraqqa jaýap berdi.

«Bul bizdiń otyz jyldaǵy nátıjemiz. Myqty azamattarymyzdy óz qabiletine saı dárejege shyǵarmaı, túrli kedergige salyp otyrdyq. Shynyn aıtsaq, bul júıemizdiń kemshiligi. Men mysaly ózim týraly aıtsam, halyqaralyq deńgeıde talaı áriptestermen, kongresmendermen kezdesip júrmin. Biraq men ózimdi halyqaralyq deńgeıdegi tulǵa dep eseptemeımin. Eger parlamenttik júıemizdi ári qaraı damytsaq, mundaı adamdar shyǵa beredi. Biraq olardy ósirý kerek, daıyndaý kerek. Jas kezinen bastap, tárbıelemesek, aıaq astynan búkil dúnıe moıyndaǵan azamattar shyqpaıdy», - dedi A. Perýashev.

Sonymen birge, A. Perýashev Qasym-Jomart Toqaevty qoldaý boıynsha qurylatyn halyqtyq koalıtsııaǵa qosylatyndaryn aıtty.

Eske sala ketsek, búgin «Aq jol» demokratııalyq partııasy prezıdent saılaýyna Memleket basshysy Qasym-Jomart Toqaevtyń kandıdatýrasyn qoldady.

Partııanyń kezekten tys HІH sezinde prezıdent saılaýyna qatysýǵa jetisýlyq jýrnalıst Sandýǵash Dúısenova, Májilis depýtaty Serik Erýbaev jáne «Aq jol» QDP Aqtóbe oblystyq fılıalynyń tóraǵasy, kásipker Asqar Sadyqov nıet bildirgen edi. Qasym-Jomart Toqaevtyń kandıdatrýasyn 74 adam – qatysýshylardyń 64,1 paıyzy qoldaǵan.