Azat Perýashev QR Prezıdentiniń bastamalary týrasynda: Búginde saıası reformalarsyz, ekonomıkany ilgeriletý múmkin emes
«Ulttyq qoǵamdyq senim keńesiniń ekinshi otyrysyndaǵy Memleket basshysynyń usynystary men tapsyrmalary «Aq jol» demokratııalyq partııasy úshin aıtarlyqtaı optımıstik kózqaras ári senim uıalatty. Atap aıtqanda, Prezıdenttiń jańashyldyq ári azamattyq kúsh-jigermen jasalǵan birqatar qadamdaryna qurmetpen qaraımyz. Jalpy, búginde saıası reformalarsyz áleýmettik-ekonomıkalyq reformalardy ilgeriletý múmkin bolmaıtyndaı jaǵdaı qalyptasyp otyr», - dedi A. Perýashev tilshilerge bergen suhbatynda.
Onyń atap ótýinshe, bul baǵytta jan-jaqty pysyqtalǵan qadamdarǵa erekshe nazar aýdarylyp otyr.
«Búginde saıasatty damytpaı, ekonomıkany damytý múmkin emes. Sondyqtan saıası júıedegi tyń qadamdarǵa nazar aýdarǵan jón. Sonymen birge, áleýmettik-ekonomıkalyq máselelerdi sheshpesten saıasatty ilgeriletý de múmkin emes. Qasym-Jomart Kemelulynyń Ulttyq keńeste sóılegen sózi Memleket basshysy qazirgi jaǵdaıdy aıqyn túsinip otyrǵandyǵynyń kórnekti dáleli ekenin baıqaýǵa bolady. Osy oraıda Prezıdent óziniń sheshimderin usyndy. Bul turǵyda Memleket basshysy birqatar mańyzdy tapsyrmalardy bergenine alǵysymdy aıtamyn jáne qýanyshtymyn», - dedi A. Perýashev.
Depýtat parlamenttik oppozıtsııa mártebesin ınstıtýttsıonaldy bekitý týraly sheshimge toqtaldy.
«Meniń oıymsha, parlamenttik opozıtsııanyń, azshylyqtyń bazalyq quqyqtary Parlament reglamentterinde ǵana emes, sonymen birge zańnamalyq turǵyda bekitilýi tıis. Sondyqtan parlamenttik azshylyq partııalary jumys istep jatqan osy obektıvti jaǵdaıǵa túsinistik tanytqan Prezıdentke alǵysymyzdy aıtamyz», - dedi Azat Perýashev.
Budan buryn habarlanǵandaı, Ulttyq qoǵamdyq senim keńesiniń 2-otyrysynda QR Prezıdenti Qasym-Jomart Toqaev parlamenttik oppozıtsııa ınstıtýty qajet ekenin atap ótti.
Memleket basshysynyń atap ótýinshe, «Parlament týraly» Zańdy saıası azshylyqqa kepildik beretin normalarmen tolyqtyrý qajet.