Azat Perýashev: Ádilet mınıstrligi jemqorlardy shetelge shyǵarmaý týraly normaǵa qarsy shyqty

<p>ASTANA. KAZINFORM &ndash; Májilis depýtaty Azat Perýashev sybaılas jemqorlyqpen kúresti jetildirýge arnalǵan zań jobasyn talqylaý kezinde halyqtyń qarjysyn jymqyrǵandardy shetelge shyǵarmaýdy usyndy.</p>

- Kapıtaldy qaıtarý jumystarynyń tájirıbesi kórsetti, shetelge shyǵýǵa tyıym salý jemqorlyqqa tosqaýyl bolatyn birden-bir tásil bola alar edi. Sebebi iri sybaılas jemqorlar aqshany konvertpen almaıdy. Árıne, olar offshorlyq aımaqtarǵa shyǵarylady. Osylaı jylystatylǵan aqshanyń izin ashý ońaı emes. Bizdiń memlekettik organdar, tipti Qarjylyq monıtorıng agenttiginiń offshorda jemqorlardyń qansha aqshasy bar ekenin bilmeıdi. Sondyqtan bul joldastar tipti ustalatynyn bile turyp táýekelge barady. Biraq belgili bir merzimge sottalady da, birazdan keıin shartty túrde bosatylady ne jazasy aıyppulǵa aýystyrylady. Osydan keıin mıllıardtaǵan aqshasymen tabysady, - dedi ol.

Depýtat bul máseleni «Aqjol» fraktsııasy 2017 jyldan beri kóterip kele jatqanyn eske saldy.

- Zań aıasynda tipti jazasyn ótep shyqqan sybaılas jemqorlardyń ózine shetelge shyǵýǵa tyıym salý kerektigin birneshe ret usyndyq. Sonda ǵana olar offshorlyq aımaqtarda halyqtan urlanǵan mıllıardtaǵan aqshasyn alańsyz paıdalana almaıdy. Eger olar osynda turýǵa májbúr bolsa, bul aqshany elge qaıtarýǵa májbúr bolady. Ókinishke qaraı, 2017 jyldan beri memlekettik organdar bul túzetýdi áli kúnge deıin qoldamady. Tipti ol usynysymyzǵa qylmystyq is júrgizý kodeksi týraly basqa zań jobasy aıasynda Úkimettiń oń qorytyndysy alyndy. Biraq Ádilet mınıstrligi usynysty qoldaǵan basqa memlekettik organdarǵa qarsy shyǵyp, jumys toby keshe bul normany qabyldaýdy keıinge qaldyrdy, - dedi Azat Perýashev.

Ulan Sarqulov usynysty depýtattarmen birge jumys tobynda talqylaýǵa daıyn ekenin aıtqan. Biraq depýtat A.Perýashev agenttik ókilinen atalǵan usynysqa qatysty jeke pikirin aıtýdy surady.

- Siz tájirıbeli depýtatsyz. Ondaı sheshimdi meniń jalǵyz ózim qabyldaı almaıtynyn bilesiz. Sondyqtan birge talqylaıyq dep otyrmyn, - dedi agenttik tóraǵasynyń birinshi orynbasary.

Aıta keteıik, Májilistiń jalpy otyrysynda sybaılas jemqorlyqqa qarsy is-qımyl máseleleri jónindegi zań jobasy talqylanyp jatyr.