Azaptaý jáne qatygezdik týraly isterdiń kópshiligi sotqa jetpeıdi - Máýlen Áshimbaev

ASTANA. QazAqparat - Senat tóraǵasy Máýlen Áshimbaev azaptaý týraly zań jobasyn qaraý barysynda Іshki ister mınıstrligi basshysyna qylmystyq-atqarý mekemeleri men polıtsııanyń qyzmettik ǵımarattaryna mindetti túrde beınebaqylaý ornatý týraly erejeni zańnamalyq deńgeıde bekitýdi usyndy, dep habarlaıdy QazAqparat tilshisi.

M. Áshimbaev quqyq qorǵaý organdarynyń ǵımarattary beınebaqylaýda bolatyny jáne barlyq is-áreketter tirkeletini týraly jaqynda qabyldanǵan ereje mańyzdy jáne ýaqtyly bolǵanyn atap ótti. Bul tásil belgili bir adamdarǵa zańsyz áreketterdiń qoldanylǵanyn dáleldeýge kómektesetin bolady.

«Biz Qylmystyq kodekske azaptaǵany úshin jazany kúsheıtetin erejelerdi engizdik, bul óte durys. Quqyq qorǵaý organdarynyń áreketterine, keıbir qyzmetkerlerdiń zorlyq-zombylyǵyna qatysty kóptegen shaǵym túsetinin aıta ketý kerek. Senatqa da ondaı shaǵymdar kelip jatyr. Biraq tájirıbe kórsetip otyrǵandaı, mundaı isterdiń basym kópshiligi sotqa jetpeıdi, óıtkeni zorlyq-zombylyq, azaptaý jáne basqa da faktilerdi dáleldeý, anyqtaý óte qıyn. Osyǵan baılanysty, biz jaqynda ǵana prokýratýramen birlesip quqyq qorǵaý organdarynyń barlyq qyzmettik ǵımarattaryna beınebaqylaý ornatýdy talap etetin ereje qabyldaǵanyńyzdy bilemiz», - dep atap ótti Máýlen Áshimbaev Senattyń jalpy otyrysynda

Osyǵan deıin Memleket basshysy quqyq qorǵaý organdarynda beınebaqylaýda kórinbeıtin jerler bolmaýy tıis ekenin aıtqan bolatyn.