Azaptaý faktileri rastalǵan ShQO túrmelerinde qosymsha kameralar ornatylady

ÓSKEMEN. QazAqparat – Shyǵys Qazaqstan oblysyndaǵy túzeý mekemesinde adamdardyń azaptalǵany dáleldengennen keıin qosymsha kameralar ornatylady, dep habarlaıdy QazAqparat tilshisi.

ShQO prokýratýrasy baspasóz qyzmetiniń málimetine súıensek, óńir aýmaǵynda 6 túzeý mekemesi ornalasqan. Onda 2 798 adam jazalaryn ótep jatyr. Osy aıdyń basynda arnaıy prokýrorlar sol túrmelerdiń birinde adamdardyń azaptalǵanyn rastaǵan bolatyn.

«Qazirgi ýaqytta túzeý mekemelerindegi zańnyń saqtalýy oblys prokýratýrasynyń erekshe baqylaýynda. Sottalǵan adamdarǵa qatysty zańsyz is-áreketterge, azaptaýlarǵa jáne ózge de qatygezdikterge jol bermeý úshin prokýratýra qyzmetkerleri mekemelerdi aralap, beınebaqylaý kameralary men beınetirkegishterden alynǵan jazbalardy turaqty túrde qarap tekserýde, sottalǵandardy jeke qabyldap jatyr. Búginde aımaqtaǵy túzeý mekemeleriniń aýmaǵyn túgel sholyp qaraý maqsatynda sottalǵandar kóp jınalatyn oryndarda 1 044 beınebaqylaý kamerasy ornatylǵan», - delingen aqparatta.

Budan bólek osy jyldyń sońyna deıin «kórinbeıtin aımaqtardy» qaraý maqsatynda qosymsha beınekameralar ornatý josparlanýda.

«Sottalǵandar elektrondy túrde ótinishterin berý úshin úzdiksiz beınebaqylaýy bar 37 termınal ornatylǵan. Jyl basynan sottalǵandar termınaldar arqyly ýákiletti organdarǵa 350 ótinish, onyń ishinde prokýratýra organdaryna 250 ótinish joldady. Alaıda azaptaý týraly ótinishter túspedi», - delingen habarlamada.