Azamattyń jasyryn aktıvteri anyqtalsa, qaryzy qaıta moınyna ilinedi – vıtse-mınıstr bankrottyq jaıly

ASTANA. QazAqparat – Bankrottyq rásimdep, keıin azamattyń basqa aktıvteri bar ekeni anyqtalsa, onyń barlyq bastapqy qaryzy qaıta moınyna ilinedi. Elorda turǵyndarymen kezdesken Qarjy vıtse-mınıstri Erjan Birjanov osylaı málimdedi, dep habarlaıdy QazAqparat tilshisi.

«Máselen, biz azamatty bankrot dep tanydyq deıik. Keıin ol 1-2 aıda jumysqa ornalasady, tabysy artady. Biz oǵan eshqandaı kedergi bola almaımyz. Eger osy bankrottyq rásimdep alyp, sodan soń jasyrǵan múlkin shyǵarsa, onda biz bankrottyqty qaıtaryp alamyz. Ony ádeıi jasalǵan shema retinde kórsetemiz. Al bankrot dep tanylyp, keıin tabysy artsa, bul azamattyń ózi úshin jaqsy. Bul zań adamdardyń tólem qabiletin arttyrý úshin jasalǵan», - dep málim etti Erjan Birjanov.

Vıtse-mınıstr bankrottyq rásimdegenderge 3 jyl júrgiziletin monıtornıng kezinde onyń ózge aktıvteri bar ekeni anyqtalsa, tıisti sheshim kúshin joıatynyn málimdedi. Ol jaǵdaıda jeke tulǵanyń burynǵy qaryzy tolyq kólemde qaıta ózine júkteledi.

«Eger azamat túrli shemalardy qoldynyp, bankrottyq rásimdep alsa jáne keıin onyń bul áreketi áshkere bolsa, onda barlyq bastapqy qaryzy qaıta moınyna ilinedi», - dep túsindirdi vıtse-mınıstr.

Sonymen qatar, Astana qalasynyń turǵyndarymen kezdesip, zańdy túsindirgen vıtse-mınıstr azamattardy bankrot dep taný – qaryzdy keshirý aktsııasy emes ekendigin basa aıtty. Sebebi munyń zańmen retteletin saldary bar.