Azamattyq sektor men memorgandardyń kommýnıkatsııalary boıynsha semınar bastaldy

NUR-SULTAN. QazAqparat - Búgin Aqparat jáne qoǵamdyq damý mınıstri Asqar Ýmarovtyń, Qazaqstan Azamattyq Alıansynyń prezıdenti Baný Nurǵazıevanyń jáne óńirlik qoǵamdyq uıym jetekshileriniń qatysýymen «Jańa Qazaqstan jaǵdaıyndaǵy azamattyq sektor men memlekettik organdardyń kommýnıkatsııalary» taqyrybynda respýblıkalyq semınar-trenıng bastaldy. Bul týraly QR Aqparat jáne qoǵamdyq damý mınıstrliginiń Facebook-tegi paraqshasynda habarlandy.

Semınar-trenıngte mınıstr Asqar Ýmarov qatysýshylarǵa arnalǵan óz sózinde: «Úkimettik emes sektordyń orasan zor qoǵamdyq áleýeti bar, onyń zııatkerlik kúshi men energetıkasyn qarapaıym azamattardyń paıdasyna, al saıyp kelgende – áleýmettik damýdyń ıgiligine aınaldyrý qajet», - dep atap ótti. Búgingi tańda Qazaqstanda 22 myńnan astam ÚEU tirkelgen, olardyń 17 myńǵa jýyǵy belsendi jumys isteıdi.

Semınardyń basty maqsaty - memleket pen qoǵamnyń ózara is-qımyl formatyn zerdeleý. Eki kúndik trenıng aıasynda Azamattyq Alıanstyń óńirlik ókilderi daǵdarysqa qarsy aqparattyq basqarý quraldaryn, memleket pen qoǵamnyń ózara is-qımylynyń jańa formatyn jáne áleýmettik medıadaǵy strategııalyq kommýnıkatsııalardy talqylaıdy.

«Eń bastysy — memlekettik júıe ashyq, ádil bolýy tıis jáne birinshi kezekte adamǵa baǵdarlanýy tıis», - dedi Qazaqstan Azamattyq Alıansynyń prezıdenti Baný Nurǵazıeva.

Jańa Qazaqstan jaǵdaıynda azamattyq sektor men memlekettik organdardyń kommýnıkatsııanyń ózekti máseleleri boıynsha semınar-trenıngtiń jumysy erteń jalǵasatyn bolady.