Azamattyq avıatsııa komıteti áýe bıletiniń nege qymbat ekenin túsindirdi
«Qazirgi ýaqytta Memleket basshysynyń Joldaýyn júzege asyrý boıynsha Jalpyulttyq sharalar jospary ázirlenip jatyr. Onyń ishinde avıabıletterdiń qymbattyǵy týraly syn aıtylǵan bolatyn. Bıletterdiń qymbat bolýynyń negizgi sebebi ushaq sanynyń jetispeýi jáne avıaotyn qunynyń qymbattyǵy bolyp otyr. Tarıf qunyn tómendetý úshin bıyl 1 mamyrda «FlyArystan» otandyq loýkosteri iske qosyldy. Eki aıda 340 myńnan astam bılet satyldy, onyń jartysyna jýyǵy 10 myń teńgeden tómen baǵaǵa satylǵan», - dedi Azamattyq avıatsııa komıtetiniń tóraǵasy Aıbek Áljanov QR Indýstrııa jáne ınfraqurylymdyq damý mınıstrliginde ótken brıfıngte.
Onyń aıtýynsha, bılet qunynyń qymbattyǵy máselesin túbegeıli sheshý úshin Úkimet «Samuryq-Qazyna» AQ birlesip, áýe parkin keńeıtý maqsatynda «Air Astana» jáne Qazaq Air syndy áýe kompanııalaryn qosymsha kapıtaldandyrýdy josparlaýda.
«Áýe tasymalynyń ózindik qunynda áýejaı qyzmeti shyǵyndary - 11%, asa kóp emes. Ózge memlekettik organdarmen, atap aıtqanda Energetıka mınıstrligimen avıaotyn baǵasyn túsirý jumystary jalǵasady. Ázirge úsh munaı óńdeý zaýytyn jańǵyrtqan soń, suranys tolyq qanaǵattandyryldy. Reseı otynyna táýeldilikti azaıttyq, bul Qazaqstandaǵy otyn baǵasyn tómendetýge yqpal etti», - dedi A. Áljanov.