Azamattyq alatyndar qazaq tilin bilýge mindetti: mınıstrlik test daıyndaıdy

<p>ASTANA. KAZINFORM &ndash; QR Ǵylym jáne joǵary bilim mınıstri Saıasat Nurbek mınıstrlik Qazaqstan azamattyǵyn alǵysy keletin sheteldikterge arnalǵan testilerdi daıarlaýǵa kirisetinin aıtty.</p>

Atap aıtqanda, memlekettik tildi qarapaıym deńgeıde, sondaı-aq elimizdiń tarıhy men Konstıtýtsııasynyń negizderin bilmegen jaǵdaıda, azamattyq berilmeıdi. Al tildi bilýdiń tıisti deńgeıin Ǵylym jáne joǵary bilim mınıstrligi aıqyndaıdy.

Bul turǵyda búgin Úkimette ótken baspasóz máslıhatynda tilshiler mınıstrden atalǵan testiler qashan daıyn bolatynyn surady.

Óz kezeginde S. Nurbek kóshi-qon zańnamasyna ózgerister bekitilgenin eske saldy.

«Endi azamattyqty alý úshin test tapsyrý kerek. Bul álem elderindegi qalypty tájirıbe, ıaǵnı AQSh, Kanada, Germanııa, Túrkııada, Reseıde osyndaı tártip bar. Bizdegi testiniń úsh komponenti bolady. Memlekettik - qazaq tilin meńgerý, Konstıtýtsııa negizderi men Qazaqstan tarıhyn bilý eskerilgen. Qazir arnaıy jumys tobyn quryp jatyrmyz. Tıisti ereje men osy testiler ázirge daıyn emes. Osy testini daıyndaý kerek», - dedi vedomstvo basshysy.

Ol bul jumystardyń jedel tártipte iske asyrylatynyn aıtty.

Budan buryn habarlanǵandaı, bıyl qysta Parlamentte kóshi-qon salasyndaǵy zańnamany jetildirýge arnalǵan zań qaraldy. Onyń aıasynda endi Qazaqstan Respýblıkasynyń azamattyǵyn alǵysy keletin sheteldikter qazaq tilin bilýge mindetti bolady.

Jaqynda Prezıdent kóshi-qon jáne QAJ salalaryndaǵy zańnamany jetildirý týraly zańǵa qol qoıdy.