Azamattarǵa «elektrondyq úkimettiń» veb-portaly arqyly banktik qaryzdar men mıkrokredıtter alýdan bas tartý quqyǵy beriledi
«Qazaqstan Respýblıkasynyń keıbir zańnamalyq aktilerine aqparattyq qaýipsizdik, aqparattandyrý jáne tsıfrlyq aktıvter máseleleri boıynsha ózgerister men tolyqtyrýlar engizý týraly» zań aqparattyq qaýipsizdik jáne derbes derekterdi qorǵaý salasyndaǵy zańnamany odan ári jetildirý, sondaı-aq tsıfrlyq maınıng jónindegi qyzmetti retteý maqsatynda ázirlendi. Parlament Májilisiniń depýtattary bastamashylyq jasaǵan zań derbes derekterdi qorǵaýdy kúsheıtýge jáne tsıfrlyq maınıng jónindegi qyzmetti retteýdi quqyqtyq jetildirýge baǵyttalǵan. Osy maqsatta Qazaqstan Respýblıkasynyń tórt kodeksine jáne on zańyna ózgerister men tolyqtyrýlar engiziledi. Qazirgi tańda derbes derekterdi qorǵaýda memlekettik baqylaý bolmaǵandyqtan, ınternet alaıaqtardyń kóbeıip, olardan myńdaǵan qazaqstandyq zardap shegip jatyr. Sondyqtan birinshiden, zań derbes derekterdiń aınalymy men saqtalýy baǵytynda memlekettik baqylaýdy kúsheıtedi. Derbes derekke ıe operatorlarmen profılaktıkalyq jumysty jolǵa qoıady. Ár operator derbes derekter jarııa bolyp ketken jaǵdaıda retteýshi memlekettik organǵa habarlaýy zańmen bekitilip otyr», - dedi zań jobasy týraly baıandaǵan senator Bıbigúl Jeksenbaı.
Onyń atap ótýinshe, ekinshiden, arnaıy Memlekettik aqparattyq qaýipsizdik ortalyǵynyń fýnktsııalary keńeıtiledi. Ortalyq memlekettik organdardyń aqparattandyrý obektilerine ózara árekettesý baǵdarlamasymen tolyqtyrylady. Qazir elimiz boıynsha 350-ge jýyq memlekettik aqparattandyrý nysandary jumys isteıdi. Ortalyq Ulttyq qaýipsizdik komıtetiniń janynda jumys isteıtin bolady. Sondaı-aq zań boıynsha jeke basty kýálandyratyn qujattardyń kóshirmelerin jınaýǵa, óńdeýge tyıym salynady. Elimizdiń qaýipsizdigi maqsatynda kóship kelýshilerdiń qujattaryn talap etý usynylady. Aqparattyq qaýipsizdikti qamtamasyz etý boıynsha jańa tetikter engiziledi.
«Zańnyń bir bóligi tsıfrlyq maınıng jónindegi qyzmetti júzege asyrýǵa arnalǵan lıtsenzııadan aıyrý, onyń qoldanysyn toqtata turý, qaıta bastaý rásimine arnalady. Sonymen qatar alaıaqtyq áreketterden qorǵaý maqsatynda adamdarǵa «elektrondyq úkimettiń» veb-portaly arqyly banktik qaryzdar men mıkrokredıtter alýdan erikti túrde bas tartýdy belgileý quqyǵy beriledi. Jalpy zańdaǵy is- sharalar kesheni memlekettik organdardyń aqparattyq qaýipsizdigin kúsheıtip, elektrondy úkimettiń turaqtylyǵyn qamtamasyz etedi», - dedi ol.
Osy oraıda Senat tóraǵasy Máýlen Áshimbaev Memleket basshysy bıylǵy Joldaýynda Qazaqstanda ІT-memleketke aınaldyrýdy mańyzdy strategııalyq mindetterdiń biri retinde belgilegendigine basa nazar aýdardy.
«Jalpy, qazirgi tańda elimizdi tsıfrlandyrý isi qarqyndy damyp keledi. Búginde azamattarymyzǵa kórsetiletin memlekettik qyzmetterdiń kóp bóligi elektrondyq formatta júzege asyrylyp jatyr. Bul rette aqparattyq qaýipsizdikti qamtamasyz etý máseleleriniń mańyzdylyǵy artyp otyr. Osyǵan baılanysty bir top Parlament depýtaty qaralyp otyrǵan zańdy ázirledi. Zań azamattardyń derbes derekterin qorǵaýdy kúsheıtýge, sondaı-aq olardy qylmystyq áreketterden qorǵaýǵa baǵyttalǵan. Sonymen qatar osy qujat aıasynda tsıfrlyq maınıng salasyndaǵy baqylaý kúsheıtiledi. Aldaǵy ýaqytta maquldanǵan zań azamattarymyzdyń múddelerin qosymsha qorǵaýǵa jáne salanyń odan ary damýyna septigin tıgizedi dep senemiz», - dedi Senat spıkeri.