«Azamattarǵa arnalǵan úkimettiń» 111 baılanys qyzmetine kimder kóbirek júginedi
Azamattardyń eń kóp saýaly zańgerlik keńes, áleýmettik qorǵaý, bilim berý, densaýlyq saqtaý salasyna qatysty.
«Azamattarǵa arnalǵan úkimet» memlekettik korporatsııasy» KEAQ-tyń BQO boıynsha fılıalynyń baspasóz qyzmetinen málim etkenindeı, 111 qyzmetimen jaǵdaıǵa beıjaı qaraı almaıtyn azamattardyń kómegimen sońǵy aılarda birneshe qıyn jaǵdaı sheshildi. Atap aıtqanda, múgedek qyzdyń mekteptegi zorlyq-zombylyqpen kúresýine kómek berildi, er adam quldyqtan qutqaryldy, ákimdiktiń qoldaýymen az qamtylǵan otbasyna órtten keıin turǵyn úıi qalpyna keltirildi, jalǵyzbasty qart ákeniń ulyn tsırkke aparý arqyly armany oryndaldy, sonymen qatar, oqýshy balaǵa kúndelikti mektepke qatynaýy úshin jol júrý kartasyn alýǵa kómek kórsetildi. 111 qyzmetiniń keńesshileri árbir qońyraýdy jeke másele retinde emes, belgili bir otbasynyń birneshe máselesin sheshý múmkindigi retinde qarastyrady.
«111 qyzmetine júginetinderdiń 60 paıyzy – 30 ben 44 jas aralyǵyndaǵy áıelder. Bul – bala quqyǵyn qorǵap, otbasyndaǵy ozbyrlyqqa qarsy kúresetin eń belsendi qoǵamdyq top. Baılanys ortalyǵynyń zańgerleri men psıhologtary habarlasqan árbir adamǵa máselesi sheshilgenshe qoldaý kórsetip, keńes beredi, qajet bolǵan jaǵdaıda quqyq qorǵaý organdaryna aqparat beredi.
Otbasy, áıelder jáne balalardyń quqyqtaryn qorǵaýdaǵy 111 qyzmeti 2023 jyldyń 16 qazanynan bastap «Azamattarǵa arnalǵan úkimet» memlekettik korporatsııasyna berilgen bolatyn. 111 nómirine táýlik boıy qońyraý shalýǵa bolady, anonımdik jáne jeke derekterdiń qorǵalýyna kepildik beriledi. Baılanys ortalyǵy quqyq qorǵaý organdarymen turaqty baılanysta, barlyq qońyraýlardy tirkep, daǵdarys sheshilgenshe árbir otbasynyń jaǵdaıyn baqylaıdy», dep habarlady vedomstvodan.
Eske sala keteıik, budan buryn HQKO qyzmetkerleri memlekettik qyzmetterdi qoǵamdyq oryndarda kórsetetinin jazǵan bolatynbyz.