«Azamattarǵa arnalǵan úkimet» korporatsııasynyń ınfraqurylymy jekeshelendirile me

<p>ASTANA. KAZINFORM &ndash; &laquo;Azamattarǵa arnalǵan úkimet&raquo; memlekettik korporatsııasynyń barlyq ınfraqurylymy memlekettik qyzmet kórsetýge jumyldyrylǵan. Bul jaıynda Májilis depýtattarynyń saýalyna Premer-Mınıstrdiń birinshi orynbasary Roman Sklıardyń jaýabynda aıtylǵan.</p>

«Qoldanystaǵy zańnama jáne ishki reglament aıasynda Memlekettik korporatsııanyń («Azamattarǵa arnalǵan úkimet» korporatsııasy) bek-ofıs fýnktsııalaryn berý, sonymen qatar ınfraqurylymdaryn jekeshelendirý júrgizilip jatqan joq jáne jekeshelendirilmeıdi. Memlekettik korporatsııa memlekettik standarttarǵa jáne bekitilgen talaptarǵa sáıkes qyzmetin jalǵastyrady. Memlekettik qyzmet kórsetýge jumyldyrylǵan barlyq ınfraqurylym memlekettik organdardyń qatań baqylaýynda tur», - dedi ol jaýabynda.

Onyń atap ótýinshe, korporatsııanyń qurylymyn, qyzmettik mindetterin kez kelgen ózgertý nemese mindetterin bólý zańnama men normatıvtik qujattar aıasynda ǵana júrgiziledi. Munyń ústine barlyq is-qımyl ashyqtyqty, eseptilikti jáne kórsetiletin qyzmetter sapasynyń joǵary deńgeıin saqtaýǵa baǵyttalady.

«Memlekettik korporatsııanyń ınfraqurylymy memlekettik qyzmetterdi júzege asyrý úshin ǵana arnalǵan jáne azamattardy qoljetimdi ári sapaly memlekettik qyzmettermen qamtamasyz etý rólin oryndaýyn jalǵastyryp keledi», - dedi Roman Sklıar.

Buǵan deıin habarlaǵanymyzdaı, aýyldyq jerlerdegi «Qazposhta» bólimsheleri memlekettik qyzmetter kórsetýi múmkin.

Munan bólek, Úkimet HQKO-lardaǵy «járdemshisymaqtardan» qutylý úshin ortalyqtarda memleket retteıtin jáne baqylaıtyn seriktes uıym engizedi.