Azamattarǵa arnalǵan úkimettiń bek-ofıs qyzmetkerleri 14 saǵattan jumys isteýde
31 naýryzda Memleket basshysy Qasym-Jomart Toqaev zeınetaqy men memlekettik járdemaqyny, AÁK pen áleýmettik kómekti qosa alǵanda, jyldyq mánde 10% ındeksatsııalaýdy tapsyrǵan bolatyn.
Sonymen qatar, tótenshe jaǵdaı kezinde tabysynan aıyrylǵandarǵa, sondaı-aq qıyn jaǵdaıǵa tap bolǵan ózin-ózi jumyspen qamtyǵandarǵa 1 ETJ nemese 42 500 teńge tóleýdi tapsyrdy. Boljam boıynsha, qoldaý úshin 3 mıllıonǵa jýyq qazaqstandyq ótinish bildirýi múmkin.
Memleket basshysynyń shuǵyl tapsyrmasyn oryndaý úshin «Azamattarǵa arnalǵan úkimet» memlekettik korporatsııasy» kommertsııalyq emes AQ Áleýmettik blogynyń qyzmetkerlerine júkteme 4 esege artty.
«Azamattarǵa arnalǵan úkimettiń» Almaty qalasy boıynsha fılıalynyń ujymy áleýmettik turaqtylyqty saqtaý úshin, Prezıdenttiń qaıta esepteý jónindegi tapsyrmasyn oryndaý maqsatynda onlaın qyzmet kórsetýge kiristi.
Fılıaldyń baspasóz qyzmetiniń habarlaýynsha, bul jumysqa fılıaldyń áleýmettik blogynyń 200-den asa qyzmetkeri jumyldyrylǵan.
«Onyń ishinde 100–den asa operator bek-ofısterde jáne 100-den asa operator úıde onlaın qyzmet kórsetýde. Jumys kestesi tańǵy saǵat 8.00-den bastalyp 22.00-ge deıin, keıde odan da uzaqqa sozylýda. Olar azamattardyń ótinishterin qabyldaıdy, tekseredi jáne ýákiletti organǵa jiberedi. Áleýmettik saqtandyrý jónindegi memlekettik qordyń (GFSS) rastaýynan keıin qujattardy tólem jasaý úshin bazaǵa engizedi. Búginde deıin respýblıka boıynsha kelip túsken 1 mıllıon 200 myńǵa jýyq ótinishtiń 20 myńnan astamy Almaty qalasynyń úlesinde. Fılıal qyzmetkerleri olardy óńdep, tólem jasaýdy qamtamasyz etýde», - delingen aqparatta.
Sondaı-aq, 1414 call-ortalyǵynda jumys isteý úshin áleýmettik bloktyń 2 operatory bólingen. Olar azamattardyń áleýmettik tólemderge qatysty suraqtaryna jaýap beredi.
«Eldegi qazirgi jaǵdaı bárimizden birlikti talap etedi. Bizdiń qyzmetkerlerimiz eselene túsken jumysyna barlyq kúsh jigerin jumsap, qaırattylyq tanytýda, óıtkeni jaýapkershilik júgi óte aýyr. Barlyq aýdandarda járdemaqyǵa ótinishter tolassyz kelip túsýde. Qyzmetkerlerimizdiń tózimdiligi men shydamdylyǵynyń arqasynda tapsyrma sapaly oryndalyp jatyr. Bul oraıda,fılıaldyń áleýmettik qamtamasyz etý blogynyń barlyq qyzmetkerlerine alǵysymdy bildiremin! Bizdiń uranymyz- SANALY QYZMET-SAPALY NATIJE!» - dedi fılıal dırektory Danııar Qyryqbaev.