«Azamattarǵa arnalǵan úkimet» kadr rezervine 353 adam irikteldi

NUR-SULTAN. QazAqparat - «Azamattarǵa arnalǵan úkimettiń» kadr rezervine irikteý 2021 jylǵy 1 naýryzda bastalyp, 30 sáýirde aıaqtaldy.

1-12 naýryz aralyǵynda tirkeýden ótken qatysýshylardan 1873 ótinim kelip tústi, dep habarlaıdy QazAqparat «Azamattarǵa arnalǵan úkimet» koroporatsııasynyń resmı saıtyna silteme jasap.

Prezıdenttik kadr rezerviniń tájirıbesin eskere otyryp, úmitkerler birneshe kezeńnen turatyn irikteýden ótti. Olar test tapsyryp, sarapshylarmen suhbattasty.

Qorytyndy kezeńde úmitkerlerdi arnaıy komıssııa iriktedi, onyń quramyna QR Parlamentiniń depýtattary, BAQ ókilderi, memleket jáne qoǵam qaıratkerleri, HR-mamandary, Memlekettik qyzmet isteri agenttiginiń jáne sybaılas jemqorlyqqa qarsy is-qımyl agenttiginiń ókilderi, Ulttyq qoǵamdyq senim keńesiniń músheleri, Memlekettik korporatsııanyń dırektorlar keńesi men basqarmasynyń músheleri kirdi.

Nátıjesinde «Daryndylar pýlyna» 353 adam qabyldandy.

«Daryndylar pýly» jobasyn QR Prezıdenti Qasym-Jomart Toqaev qoldady, ol bizge irikteý kezeńderiniń barynsha ashyq ótýin tapsyrǵan bolatyn. Oǵan kez kelgen qazaqstandyq qatysa aldy. Jobany iske asyrý Memlekettik korporatsııada merıtokratııa qaǵıdattaryn engizýge jáne «áleýmettik lıft» tetikterin paıdalanýǵa kómektesedi dep senemin. Rezervke ótkenderdiń taǵaıyndaýlary taıaý ýaqytta bos oryndar paıda bolǵan kezde júzege asyrylady», – dedi «Azamattarǵa arnalǵan úkimet» basqarma tóraǵasy Ádil Qojyqov.

Jobanyń basty maqsaty – bolashaǵynan úmit kúttiretin qyzmetkerlerdi tabý, olardyń biliktiligin jetildirý jáne aldaǵy ýaqytta bos basshylyq laýazymdarǵa usyný.

Іrikteýdi ázirleý kezinde «Prezıdenttik Jastar kadr rezervi», «Elbasy Akademııasynyń salalyq menedjerleri» jáne «Jas Órken» sııaqty uqsas jobalardyń tájirıbesi eskerildi.

Osylaısha, «Daryndylar pýly» Qazaqstandaǵy kadrlar rezervin qurý boıynsha tórtinshi iri jobaǵa aınaldy.