Azamattardyń jeke bıznesine kedergi keltirgen 47 adam jaýapqa tartyldy – Antıkor

ASTANA. QazAqparat – «Bızneske jol» jobasy aıasynda kásipkerlerdiń isine kedergi keltirgen 47 laýazymdy tulǵa jaýapqa tartyldy. Bul týraly OKQ-de ótken brıfıngte Sybaılas jemqorlyqqa qarsy is-qımyl agenttigi Preventsııa qyzmetiniń basshysy Saıan Ahmetjanov aıtty, dep habarlaıdy QazAqparat tilshisi.

«Memleket basshysynyń tapsyrmalaryn jáne bıznesti qorǵaý máseleniń mańyzdylyǵyn eskere otyryp, agenttik jyl basynan beri «Bızneske jol» jobasyn iske qosty. Ol kásipkerlerdiń naqty máselelerin sheshýge baǵyttalǵan. Jobany «Atameken» Ulttyq kásipkerler palatasymen birlesip júzege asyrýdamyz. Biz bıznespen kúndelikti kezdesýler ótkizemiz jáne olardyń qalypty jumys isteýine neniń jáne kimniń kedergi keltiretinin anyqtaımyz. Jobany iske asyrý bastalǵannan beri 7,2 myń kásipkermen kezdestik, olardan 500-ge jýyq ótinish kelip tústi. Qazirgi ýaqytta olardyń 242-i qanaǵattandyryldy. Qalǵandary boıynsha jumys júrgizilýde. Qabyldanǵan sharalarmen sybaılas jemqorlyq faktorlary joıylyp, 6 myńǵa jýyq kásipkerdiń quqyqtary qalpyna keltirildi», - dep málim etti Saıan Ahmetjanov.

Onyń aıtýynsha, anyqtalǵan faktiler boıynsha 47 laýazymdy tulǵa jaýapqa tartylǵan.