Azamattardyń nesıesin jabý protsedýrasy qashan bastalady

NUR-SULTAN. QazAqparat - Qazaqstandyqtardyń nesıler boıynsha boryshyn memleket pen bankter esebinen jabý jumystary qashan bastalady? Bul jóninde Úkimettiń baspasóz ortalyǵynda QR Premer-Mınıstrdiń orynbasary - Qarjy mınıstri Álıhan Smaıylov aıtyp berdi, dep habarlaıdy QazAqparat tilshisi.

«Biz bul jumysty qazirdiń ózinde bastap kettik. Bankterdegi tizimdi aıqyndaý, áleýmettik qamsyzdandyrý organdarynyń tizimimen salystyrý jumystary bastaldy. Barlyq sanattaǵy azamattardyń tizimin bank mekemeleriniń málimetterimen salystyryp jatyrmyz. Sebebi, naqty sanattaǵy azamattardyń qaryzyn óteıtinimizdi bilýimiz kerek», - dedi Álıhan Smaıylov.

Mınıstrdiń aıtýynsha, shilde aıynda qaryzdy óteýge baılanysty qarajatty pysyqtaý jumysy Parlamentte qaralady.

«Biz qazirgi ýaqytta respýblıkalyq bıýdjetten bólinetin 88 mlrd teńgege qosymsha 17 mlrd teńge qosý úshin Problemalyq kredıtter qorynyń oblıgatsııalaryn shyǵarǵaly jatyrmyz. Parlamentten ótkennen keıin aıqyndaý, pysyqtaý jumystaryn 10 shildede aıaqtap, birden nesıeni jabý boıynsha jumysty bastap ketemiz. Jalpy, jumysty aldaǵy 2 aıda bitiremiz», - dedi Álıhan Smaıylov.

Aıta ketsek, keshe QR Prezıdenti Qasym-Jomart Toqaev «Qazaqstan Respýblıkasy azamattarynyń qaryz júktemesin azaıtý týraly» Jarlyqqa qol qoıǵan bolatyn.

Elimizdegi áleýmettik turmysy tómen toptaǵy azamattar - kópbalaly otbasylar, múgedek balalary bar otbasylar, jalǵyz asyraýshysynan aırylǵan otbasylar, ataýly áleýmettik kómek alatyndar jáne jetim balalar túrli sebeptermen qıyn jaǵdaıǵa tap bolyp, óz attaryna alǵan nesıelik mindettemelerin oryndaı almaı otyr.

Tikeleı jáne ataýly qarjylaı kómek retinde joǵaryda atalǵan sanattaǵy azamattar úshin memleket ekinshi deńgeıli bankter men shaǵyn qarjy uıymdarynan alynǵan jalpy mólsheri 300 myń teńgege deıin negizgi nesıeni jáne oǵan eseptelgen syıaqyny óteıdi.