Azamattardyń nesıesin óteý: Qarajat 5 qyrkúıekke deıin aýdarylady

NUR-SULTAN. QazAqparat –Bankter borysh júktemesi boıynsha qarajatty qaryz alýshylardyń shottaryna 5 qyrkúıekke deıin aýdarady, dep habarlaıdy QazAqparat tilshisi.

«Osy jyldyń 20 tamyzynda Eńbek jáne halyqty áleýmettik qorǵaý mınıstrliginen alynǵan málimetke sáıkes, jıyny 105 mlrd teńgelik qaryzy óteletin 500 myńnan astam adam aıqyndaldy. Qazirgi tańda qarajat tıisti qarjylyq ınstıtýttarǵa aýdaryldy. 5 qyrkúıekke deıin bankter qaryz alýshylardyń shottaryna bul qarajattardy taratý jumystaryn júrgizýi kerek. Al 9 qyrkúıekte Úkimetke jáne osy baǵdarlamanyń operatorlaryna qarajattyń shottarǵa aýdarylǵany týraly aqparatty berýi tıis», - dedi Ulttyq bank tóraǵasynyń orynbasary Oleg Smolıakov Úkimettiń baspasóz ortalyǵyndaǵy jıynda.

Aıta ketsek, borysh júktemesin jeńildetý boıynsha 507 myń qazaqstandyq anyqtaldy.

Eske salsaq, QR Prezıdenti Qasym-Jomart Toqaev qazaqstandyqtardyń borysh júktemesin jeńildetý týraly Jarlyqqa qol qoıǵan bolatyn.

Al arada bir aı ótkende borysh júktemesin azaıtýǵa qatysty QR Úkimetiniń qaýlysy jarııalandy. Ekinshi deńgeıdegi bankterdegi jáne mıkroqarjy uıymdaryndaǵy kepilsiz tutynýshylyq qaryzdar myna talaptardyń bárine sáıkes kelgen kezde ótelýge jatady.

Munymen qosa, onda qaryz boıynsha jalpy bereshegi 2019 jylǵy 1 maýsymdaǵy jaǵdaı boıynsha 3 000 000 (úsh mıllıon) teńgeden aspaıtyn bolsa, sondaı-aq negizgi boryshy men oǵan eseptelgen syıaqydan turatyn óteletin bereshektiń mólsheri bir qaryz alýshyǵa 300 000 (úsh júz myń) teńgeden aspaıtyn bolsa, ótelýge jatatyndyǵy aıtylady.