Azamattardyń nesıesin ótep berýde bankterdiń qatysýy qandaı bolady

NUR-SULTAN. QazAqparat - Qazaqstandyqtardyń nesıeleri boıynsha aıyppuldar men ósimderdi alyp tastaý bankterge salmaq túsirmeıdi. Bul týraly QR Premer-mınıstriniń birinshi orynbasary - Qarjy mınıstri Álıhan Smaıylov málim etti, dep habarlaıdy QazAqparat tilshisi.

«Negizgi boryshty óteý memleket tarapynan bolady. Jańa aıtylǵandaı, respýblıkalyq bıýdjetten 88 mlrd teńge kózdeledi. Onyń ishinde, taǵy 17 mlrd teńgeni memleket tarapynan oblıgatsııa shyǵaryp tartamyz. Sonymen, 105 mlrd teńge memleket tarapynan keledi. Al aıyppuldar men ósimder boıynsha 75 paıyzy rasynda da, qarjy uıymdary tarapynan óteledi. Bul jumysty Ulttyq bank banktermen jáne shaǵyn qarjylyq uıymdarmen birge kelisim boıynsha jasaıdy. Aıyppul - ol protsent. Bankterdiń ózderi qoıǵan protsentteri. Bul bankterge eshqandaı salmaq túsirmeıdi», - dedi Álıhan Smaıylov búgin Úkimettiń baspasóz ortalyǵynda.

Onyń aıtýyna qaraǵanda, ekinshi deńgeıli bankter men qarjylyq uıymdarda qaryz nesıesi óteletin azamattardyń tizimi bar.

«Iá, ár bankte, shaǵyn qarjy uıymdarynda joǵaryda atalǵan áleýmettik topqa kiretin adamdardyń naqty tizimderi bar. Sondyqtan, olar osy tizimder boıynsha jumys júrgizetin bolady», - dedi ol.

Sondaı-aq shara barysynda Úkimet basshysynyń orynbasary Gúlshara Ábdiqalyqova naqty qandaı sanattaǵy azamattardyń qaryzy óteletinin taǵy eske saldy.

«Bul jaǵdaıda biz naqty Jarlyqqa baılanysty jumys júrgizýimiz kerek. Sanattardy aıtar bolsaq, eń birinshiden, kópbalaly otbasylar. Olar - tórt nemese odan da kóp balalary bar otbasylar. Osyndaı otbasylardyń nesıesi bar ma - baza boıynsha qaralady. Ekinshiden, asyraýshysynan aıyrylǵan jaǵdaıǵa baılanysty tólem alatyn otbasylar. ıAǵnı, qazir bizdiń memlekette 600 myńǵa jýyq asyraýshysynan aıyrylǵan otbasy bar. Baza boıynsha olardyń qansha nesıesi bary qaralady. Kelesi, múgedek balalary bar otbasylar, 18-den asqan, biraq bala kezinen múgedek balalary bar otbasylar jáne eń az qamtamasyz etilgen otbasylar, ıaǵnı ataýly áleýmettik kómek alatyndar. Osyndaı otbasylardyń da nesıesi baza boıynsha qaralady», - dedi ol.

Aıta ketsek, elimizdegi áleýmettik turmysy tómen toptaǵy azamattar - kópbalaly otbasylar, múgedek balalary bar otbasylar, jalǵyz asyraýshysynan aırylǵan otbasylar, ataýly áleýmettik kómek alatyndar jáne jetim balalar túrli sebeptermen qıyn jaǵdaıǵa tap bolyp, óz attaryna alǵan nesıelik mindettemelerin oryndaı almaı otyr.

Tikeleı jáne ataýly qarjylaı kómek retinde joǵaryda atalǵan sanattaǵy azamattar úshin memleket ekinshi deńgeıli bankter men shaǵyn qarjy uıymdarynan alynǵan jalpy mólsheri 300 myń teńgege deıin negizgi nesıeni jáne oǵan eseptelgen syıaqyny óteıdi.