Azamattardyń barlyq sanattaryna arnalǵan arzan páterler satyla bastady

ASTANA. QazAqparat - «Nurly jer» turǵyn úı qurylysy baǵdarlamasy operatorlarynyń biri - «Báıterek development» AQ azamattardyń barlyq sanattary úshin qoljetimdi turǵyn úıdi satýǵa shyǵarady. Bul týraly QazAqparat kompanııanyń baspasóz qyzmetine silteme jasap habarlaıdy.  

Búgingi kúni Aqtóbe, Qostanaı, Qyzylorda, Pavlodar, Taraz, Oral, Shymkent, Ekibastuz qalalarynda daıyn turǵyn úıler satylyp ta jatyr. Keleshekte bularǵa basqa óńirler de qosyla alady.

«Bastapqyda «Nurly jer» baǵdarlamasy boıynsha salynǵan turǵyn úıler Turǵyn úı qurylys jınaq bankiniń salymshylaryna arnalǵan edi. «Báıterek development» AQ jyljymaıtyn múlik obektilerin ótkizý qaǵıdalaryna sáıkes jarty jyldan keıin qalǵan páterler naryqtyq sharttarmen satýǵa shyǵarylady jáne bul turǵyn úıdi kez kelgen qazaqstandyq azamat satyp ala alady», - dep naqtylady «Báıterek development» AQ Basqarma tóraǵasynyń orynbasary Asqarbek Óserbaev.

Sharshy metr qurylysynyń quny -  turaqty. Astana, Almaty, Atyraý jáne Aqtaý qalalary úshin ol sharshy metri 200 myń teńgeden, basqa qalalar úshin - 180 myń teńgeden aspaıdy. Keıbir óńirlerde turǵyn úıdi satyp alýshylar baǵdarlamamen belgilengen parametrlerden tómen baǵamen satyp ala alady. Mysaly, Shymkentte aýqymy 40 sh.m. bir bólmeli páterdi 7 mln teńgege satyp alýǵa bolady. Oralda uqsas páterdiń quny 5,6 mln teńgeden, Qostanaıda - 5 mln teńgeden, Pavlodarda - 6,3 mln teńgeden bastalady. Barlyq turǵyn úıler taza árlengen jáne jaılylyqtyń úshinshi synybyna jatady.

«Bul rette usynys jeke tulǵalarǵa da, zańdy tulǵalar da taralady. Óz qyzmetkerlerin turǵyn úımen qamtamasyz etýge múddeli kez kelgen uıym digital.baiterek.gov.kz onlaın-platformasynda «Qoljetimdi turǵyn úı» bólimi arqyly páter satyp alý úshin ótinim joldaı alady», - dep tolyqtyrdy A.Óserbaev.

Satyp alýshylarǵa tólem qabilettiliginen basqa qoıylatyn negizgi talaptar jeke tulǵalar úshin - Qazaqstan Respýblıkasy azamattyǵynyń bolýy; zańdy tulǵalar úshin - Qazaqstan Respýblıkasy aýmaǵynda tirkelýi jáne óz qyzmetin júzege asyrýy bolyp tabylady.

Páterdi óz qarajattarynyń esebinen nemese ekinshi deńgeıdegi bankterdiń ıpotekalyq qaryzdaryn tartý jolymen satyp alýǵa bolady. Qazirgi ýaqytta «Nurly jer» boıynsha ıpotekany kompanııanyń seriktes-bankteri: ATF-Bank, VTB, Sberbank, Centrcredit usynady. Turǵyn úı qurylys jınaq bankinde jınaǵy bar salymshylar turǵyn úıge burynǵysha qol jetkize alady.