Azamattar telefondaǵy QR-kod arqyly elektrondy qoltańbasyn qoıa alady – Baǵdat Mýsın

ASTANA. QazAqparat – Azamattardyń elektrondy qoltańbasy uıaly telefonda saqtalady. Bul týraly Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın aıtty, dep habarlaıdy QazAqparat tilshisi.

«Búginde memlekettik ınternet-portaldardy paıdalanýshy kompterge NCALayer nemese Java sııaqty qosymsha baǵdarlamalardy ornatýǵa mindetti. Bul kóptegen qoldanýshyǵa qıyndyq týdyrady. Soǵan oraı biz bul qıyndyqty árbir adamnyń qolyndaǵy mobıldi telefon arqyly sheshemiz. Mobıldi telefonda elektrondy qoltańba saqtalady ne bolmasa onlaın rejımde bıometrııalyq birizdendirý negizinde óndiriledi», - dedi mınıstr Senat otyrysynan keıin BAQ ókilderiniń saýalyna oraı.

Onyń túsindirýinshe, elektrondy qoltańda bultty formatta saqtalady.

«Adam elektrondy qoltańbany qoldanǵysy kelgen kezde eGOV mobile-di ashyp, qol qoıǵysy kelgen qujatqa QR kodty baǵyttaıdy. Sol sátte QR-kod oqyp, ol qujatqa qol qoıýǵa kelisim berý túımesin basady. Qol qoıýǵa qatysty bul protsedýranyń bári mobıldi qurylǵyda jáne serverlerde júredi», - dedi Baǵdat Mýsın.

Mınıstr qazirgi ýaqytta telefon arqyly qol qoıýǵa qajetti ınfraqurylymnyń ázirlengenin, endi árbir memleketti organ ony sońyna deıin pysyqtaýy tıistigin basa aıtty.

«Memlekettik portaldarǵa qatysty aıtar bolsam, kelesi jyly barlyq portaldy qol qoıýdyń osynaý jańa tetigine kóshiremiz. Qazaqstan azamattaryna HQO-larǵa barýdyń, elektrondy qoltańbany fleshkaǵa jazyp alýdyń, saýal joldaýdyń qajeti bolmaıdy. Munyń bári telefonda bolady ári telefonnyń kómegimen elektrondy qoltańbasyn qoıýǵa múmkindik alady», - dedi mınıstr.