Azamat Satybaldy Qazaqfılmniń qarjylyq máselesin qalaı sheshpek
«Qazaqfılmniń qıyn kezeńderdi bastan ótkerip jatqanyn túsinemin, biraq biz stýdııany 5 jylǵa damytý strategııasyn jasadyq. Onyń ishinde Mádenıet mınıstrligimen keshendi jumys júrgizýdi josparlap otyrmyz. Kórermen kelesi jyly jumystyń alǵashqy nátıjesin kóre bastaıdy. Qazir biz 9 fılm túsirip jatyrmyz, onyń ishinde 4 fılm — memlekettik tapsyrys, 5 fılm demeýshilik qarajat esebinen túsiriledi. Alǵashqy premeralar 2025 jyldyń aqpanynan bastalady. Solardyń arqasynda jaqsy kassa jınaımyz degen úmittemiz», — dedi Azamat Satybaldy elordada Comic Con Astana festıvalinde.
Buǵan deıin Parlamentte kıno salasyndaǵy bıýdjettiń tıimsiz ıgerilýi synalǵan edi.
2016-2022 jyldary Qazaqfılmge kıno shyǵarýǵa jáne prokattaýǵa 14,5 mlrd teńge bólingenimen onyń 4,8 paıyzy ǵana aqtalǵan.
Sondaı-aq osydan birneshe kún buryn «Altyn adam» týyndysynyń anımatorlary jeti aıdan beri jalaqy almaǵanyn aıtyp, Qazaqfılm ǵımaratynyń aldynda narazylyqqa shyqqan bolatyn.
Keıinnen Qazaqfılm anımatorlardyń qordalanǵan aılyǵyn tólep beretinin málimdedi.
Aıta keteıik, 25-28 shilde kúnderi elordada III halyqaralyq Comic Con Astana festıvali ótedi.
Bul — komıkster, kınematografııa, vıdeo oıyndar, anıme jáne gık-mádenıettiń ózge de baǵyttaryna arnalǵan halyqaralyq festıval.