Azamat Dáýletbekov pen Asyl Aıtaqyn Azııa chempıonatyndaǵy júldesi jóninde oı bólisti

<p>BІShKEK. KAZINFORM&nbsp;&mdash; Erkin kúresten Azııa chempıony atanǵan qazaqstandyq balýan Azamat Dáýletbekov pen kúmis júldeger Asyl Aıtaqyn alǵan júldeleri jaıynda oı-pikirin bildirdi.</p>

Qyrǵyzstan astanasy Bishkek qalasynda ótken qurlyqtyq dodada Azamat Dáýletbekov (86 keli) fınalda ózbekstandyq Jabraıl Shapıevti 5:2 esebimen jeńdi.

Osylaısha ol óz salmaǵynda úsh dúrkin Azııa chempıony atandy.

«Jeńis tuǵyrynan kóriný ońaı bolǵan joq. Dese de, sáttilik serik boldy. Úshinshi márte chempıon ataǵyn jeńip aldym. Osy jeńisimdi sý tasqynynan zardap shekken barlyq qazaqstandyqtarǵa arnaımyn. Eshkimniń eńsesi túspesin deımin. Biz sizdermen birgemiz», — dedi Azamat Dáýletbekov.

Al Asyl Aıtaqyn (61 keli) fınalda qyrǵyzstandyq Taıyrbek Jýmabek ýýlýnan 3:1 esebimen jeńilip qaldy.

«Maqsatym — altyn medal alý edi. Degenmen qurlyqtyq dodada kúmis medal buıyrdy. Aldaǵy ýaqytta ketken olqylyqtyń ornyn toltyryp, jeńis tuǵyrynan kórinýge kúsh salamyn», — dedi Asyl Aıtaqyn.

Endi 13-14 sáýir kúnderi áıelder, 15-16 sáýirde grek-rım sheberleri boz kilemge shyǵady.