«Azaly kúni aıylyn jımaǵandar aıypsyz qala bere me?» - BAQ-qa sholý

ASTANA. 31 qańtar. QazAqparat - «QazAqparat» agenttigi respýblıkalyq basylymdarda 31 qańtar, beısenbi kúni shyqqan ózekti materıaldarǵa sholýdy usynady.

***

«Elektr qýatyn únemdeý máselesi jahandyq deńgeıde erekshe mańyzǵa ıe. Onyń balama kózin qarastyrý úshin sarapshylar talaı márte bas qosty. Osy baǵyttaǵy jumysty júıeleý maqsatymen Qazaqstanǵa BUU ókili Gordon Djonson arnaıy at basyn burdy. Ol elimizdiń birqatar óńirin aralap, jeldiń soǵý baǵytyna zertteý jumysyn júrgizgen», - dep jazady «Egemen Qazaqstan» gazeti búgingi nómirindegi «Qýat kózin únemdeý joly» degen taqyryptaǵy maqalasynda. Maqala avtorynyń «Ulttyq ınnovatsııalyq qor» AQ-nyń deregine súıenip jazýynsha, 2030 jylǵa deıin 46 aýdanda qýaty 1 mln. kvt/saǵ. bolatyn jel stansalary salynady. Al osyǵan deıin Ońtústik Qazaqstan oblysynyń Kentaý qalasynda jáne Qaraǵandy oblysynyń Kentaý qalasynda jel stansalary boı kótergen. Jalpy, balama qýat kózderin eseleýde bıoqaldyqtardyń da orny erekshe. Beıresmı aqparda kórsetilgendeı, jyl saıyn mal sharýashylyǵy salasynda qurǵaq kúıinde 22,1 mln. tonna qaldyq bolady eken. Sonymen birge 17,7 mln. ósimdik qaldyǵyn jaratýdyń múmkindigi bar.

***

«Halyq quqyq qorǵaý organdaryna nege senimsizdikpen qaraıdy?». Dál osy saýaldy «Aıqyn» gazetiniń týyndatýyna kúni keshe Aqordada ótken alqaly jıyn túrtki boldy. Ol jıynda quqyq qorǵaý organdaryna halyqtyń senimsizdikpen qaraıtyny ashyq aıtylǵan edi. Mine osy saýalǵa jaýap bergen halyq ártisi, rejısser-dramatýrg Ersaıyn Tóleýbaı: «Quqyq qorǵaý organdarynyń qyzmetkerleri ǵana emes, basqa da memlekettik qyzmetkerlerdiń arasynda óz qyzmetin paıdalanyp, aqsha tabýdy, baıýdy kózdeıtinder kóp. Teksiz adam teksizdigin ja­saıdy», - depti. Al zańger Ǵabıden Jaılın bolsa, keıbir jaǵdaılarda jábirlenýshige zańgerlerdiń ózderi kómektese almaıtyndyǵyn ashyq aıtypty. «Quqyq qorǵaý organdarynyń jalpy adam quqyǵyna degen kózqarasy durys emes, olar ózderine kelgen adamdarǵa mensinbeı qaraıdy. Jaqynda kólik júrgizýshini ustap alyp, oǵan mal sııaqty aıqaılap jatqanyn kórdim. Olardyń zańsyz áreketterin dáleldeý múmkin emes. Keıbir jaǵdaılarda jábirlenýshige zańgerlerdiń ózderi kómektese almaıdy», - deıdi zańger.

Memleket basshysy Nursultan Nazarbaevtyń Jarlyǵymen «Kókshetaý-Almaty» baǵytymen ushyp kele jatqan áýe kemesiniń apatqa ushyraýyna baılanysty keshe el turǵyndary aza tutty. Memlekettik telearnalar men radıo toraptar oıyn-saýyqtyq baǵdarlamalardy kúrt tyıyp, qabyrǵasy qaıysqan otbasylardyń qaıǵysyna ortaqtasty. Biraq keıbir kommertsııalyq jáne kabeldik jeliler arqyly taraıtyn arnalar men «Rýsskoe radıo», «Retro FM», «Tengrı FM», «Avtoradıo», «NS» jáne basqa birqatar radıolar aıylyn jıǵan joq. Kúndelikti daǵdysymen kó­ńil kóterip, úırenshikti jumystaryn jalǵas­tyra berdi. Bul jaıynda «Aıqyn» gazetiniń búgingi sanyndaǵy «Azaly kúni aıylyn jımaǵandar aıypsyz qala bere me?» degen taqyryptaǵy maqalada baıandalǵan. «Nege? Zań boıynsha tý túsirilgen sátte barlyq telearnalar men radıolardan oıyn-saýyqtyq, kóńilashar baǵdarlamalar toqtatylyp, jarna­malar kórsetilmeýi tıis. «Kommertsııalyq habar taratatyn tele-radıolarǵa bul zańnyń qatysy joq, tek memlekettik arnalar aza tutsyn» dep, jalpyǵa ortaq aýyrtpalyqty eshkim saýdala­maǵan shyǵar. Olardyń osy memlekette turatyn qoǵam múshesi retinde de arystaı azamattardyń ajaly men qaraly eldiń basyndaǵy aýyr qaıǵy­ǵa selt etpegenderi qalaı? Júrekteri aýyryp, jandary ashymaǵany ma? Qaıǵyny bólisýdiń ornyna nemketti qaraǵany nesi?», - dep jazady maqala avtory.

***

Depressııa qazaqtyń sózi emes. Desek te, qazir qazaqqa tán aýrý bolyp turǵan syńaıy bar. Bizdiń túsinigimizde ol - jannyń kúızelýi, qaıǵyǵa salyný, áldenege qamyǵý... Qazaqstan «depressııaǵa ushyraǵan» elder arasynda aldyńǵy qatarda tur desedi. Al osy jan kúızelisiniń eń sońǵy «núktesi» - adamdardyń óz-ózine qol salyp ólýi deńgeıi boıynsha, sonyń ishinde jasóspirimderdiń arasyndaǵy sýıtsıdtiń kóptiginen, ókinishke qaraı, kóshtiń basynda kele jatyrmyz. Bulaı kete bersek, qaıda baryp toqtarymyz belgisiz. Bul jaıynda tolyǵyraq «Alash aınasy» gazetindegi «Depressııaǵa qarsy ulttyq baǵdarlama kerek» atty maqalada jazylǵan.


***

«Keshe Memleket basshysy Nursultan Nazarbaev Aýyl sharýashylyǵy mınıstri Asyljan Mamytbekovti qabyldady», - dep jazady «Kazahstanskaıa pravda» basylymy. Kezdesý barysynda mınıstr Memleket basshysyna elimizdiń agrarlyq saladaǵy jumysynyń 2012 jylǵy qorytyndylary jáne ony odan ári damytýdyń 2020 jylǵa deıingi negizgi baǵyttary týraly baıandady. «Memleket aýyl sharýashy­ly­ǵyna jan-jaqty qoldaý kór­se­tip keledi. Qarjylandyrý jyl saıyn ósip otyr. Elimiz­diń agroónerkásibiniń negizgi maq­saty - ishki naryqty ózi­miz­diń azyq-túlikpen jáne otandyq ónimdermen 80 paıyzǵa deıin qamtamasyz etý. Búgingi kúni agroónerkásip salasyn damytýdyń aldaǵy kezge ar­nal­ǵan baǵdarlamasy ázirlengen. Bul salada aýqymdy jumystar kútip tur», - dedi Prezıdent.