Az somada mobıldi aýdarym alǵandarǵa salyq salmaý usynyldy

<p>ASTANA. KAZINFORM &ndash; Qazaqstanda óte tómen somada mobıldi aýdarym alatyn adamdarǵa salyq salmaý usynylyp otyr. Bul týraly Memlekettik kirister komıteti Jeke tulǵalardyń kiristerin ákimshilendirý basqarmasynyń bas sarapshysy Ersaıyn Kóptileýuly aıtyp berdi.</p>

Mamannyń aıtýynsha, qazirgi ólshemshartta aýdarym somasyna esh meje qoıylmaǵan. Aı saıyn 100 adam 100 teńgeden aýdarsa da, kirister organdarynyń nazaryna ilinedi.

− Osyǵan baılanysty, Qarjy mınıstrligi tarapynan usynys berilgen bolatyn. Kásipkerlik kodeksinde 12 eselengen eń tómenge jalaqyǵa deıin (1 020 000 teńge) árbir adam jeke kásipker retinde tirkelmeı óz qyzmetin júrgizýge, tabys tabýǵa múmkindigi bar. Osy normadan attap ketpeý maqsatynda, óte tómen somada mobıldi aýdarym alatyn adamdardy ákimshilendirmeý maqsatynda aı saıyn 100 nemese odan da kóp tulǵalardan úsh aı qatarynan, jalpy somasy 255 myńnan asatyn aýdarym qabyldansa, sonda ǵana nazarǵa alynsyn degen usynys berildi. Bul qazir Ulttyq bankpen kelisý satysynda, áli qoldanysta emes, − dedi Ersaıyn Kóptileýuly agenttiktiń «Bizdin orta» podkastynda.

Bul rette 255 myń teńge – eń tómengi jalaqynyń (85 myń teńge) úsh eselengen mólsheri.

− Qazir bir aýdarymnyń ózi 255 myńdy quraýy múmkin, olar nazarǵa alynbaıdy. Sondyqtan, úsh aı qatarynan úsh tómengi jalaqy mólsherinen asatyn aýdarymdardy ǵana nazarǵa alý usynysyn engizdik. Aldaǵy ýaqytta bul qoldanysta bolýy múmkin, - deıdi komıtet ókili.

Mobıldi aýdarymdar tek Kaspi emes, barlyq bankte baqylanatynyn jazǵan bolatynbyz.