«Áz-Naýryzǵa ázirlikti bastasaq qaıtedi?» - respýblıkalyq basylymdarǵa sholý
***
«Keshe Elbasy Nursultan Nazarbaev Qazaqstan Respýblıkasy Parlamenti palatalarynyń birlesken otyrysyna qatysyp, V shaqyrylǵan Qazaqstan Respýblıkasy Parlamenti birinshi sessııasynyń ashylýynda sóz sóıledi. Parlament palatalarynyń birlesken otyrysyn, Májilis Tóraǵasy saılanǵanǵa deıin, Ata Zańǵa sáıkes Ortalyq saılaý komıssııasynyń tóraǵasy Qýandyq Turǵanqulov júrgizdi. Ol depýtattar tirkelýden ótken soń qajetti kvorým bar ekenin jarııalap, sessııa jumysyn ashty. Odan ári Memlekettik ánuran oryndalyp, alǵashqy sóz Prezıdent Nursultan Nazarbaevqa berildi», - dep jazady «Egemen Qazaqstan» gazeti senbilik sanyndaǵy «Tórteý túgel bolsa, tóbedegi keledi» degen taqyryptaǵy maqalasynda. Kóppartııaly Parlamenttiń jumysy bastalatyn sessııa asa jaýapty bolyp tabylatynyn atap kórsetken Elbasy: «Táýelsizdiktiń úshinshi onjyldyǵyn biz saıası jańǵyrýmen bastadyq. Bul básekelestik jaǵdaıynda baıypty sheshimderdiń qabyldanýyna jol ashady dep sanaımyn. Taıaýdaǵy oqıǵalar qoǵamymyzdy biriktire tústi. Elimiz táýelsizdik jolynda tatýlyq pen turaqtylyqty, tynyshtyq pen túsinistikti tańdady. Bul - órleý men órkendeý úshin daýys bergen otandastarymyzdyń ortaq oljasy men jasampaz jeńisi bolyp sanalady», - dedi.
«Egemen Qazaqstan» gazetiniń jazýynsha, keshe keshkilik Pavlodar oblysyna barǵan Úkimet basshysy Kárim Másimov oblys aktıvimen jıyn ótkizip, óńirdi basqarǵan Baqytjan Saǵyntaevtyń Elbasy Jarlyǵymen elimizdiń Ekonomıkalyq damý jáne saýda mınıstri bolyp taǵaıyndalǵanyn jetkizgen. Budan keıin Úkimet basshysy oblys aktıvine oblystyń jańa basshysy Erlan Aryndy tanystyrdy. «Al bul esim oblys halqyna óte tanys. Buǵan deıin Sultanmahmut Toraıǵyrov atyndaǵy memlekettik ýnıversıtettiń rektory bolǵan Erlan Muhtaruly joǵary oqý ornyn basqara júrip belsendi rýhanı-mádenı qyzmet atqardy. Ultymyzǵa jasaǵan eldik, egemendik baǵytyndaǵy eńbegimen kózge tústi. Úkimet basshysy jańa oblys ákimi E.Arynnyń alda atqaratyn jumystarynyń keıbirine toqtalyp, qaı salaǵa basa nazar aýdarý kerektigin atap kórsetti jáne eldi eńselendirý jolyndaǵy eńbegine sáttilik tiledi», - dep jazady basylym.
***
«Naýryz-alıans» qoǵamdyq klýby jaǵymdy jańalyqtyń shetin shyǵardy. «Memlekettik mereke - ultymyzdyń mereıi. Naýryz - solardyń ishindegi bastysy da, jarqyny da» degen klýb músheleri «ókinishke qaraı, bul meıramnyń egemen eldiń tamyry tereń merekesi retinde ómirden óz ornyn ala almaı kele jatqandyǵyn» ashyq aıtypty», - dep jazady «Aıqyn» gazeti «Áz-Naýryzǵa ázirlikti bastasaq qaıtedi?» degen taqyryptaǵy maqalasynda Basylymnyń atap ótýinshe, bunyń basty sebebi - meıramnyń etnografııalyq sıpattan aryla almaı, azamattyq mereke mazmunyn boıyna sińire almaýynan kórinedi.
Ata-babamyz urpaq órbitip, qazaqtyń sanyn kóbeıtýdi maqsat tutsa kerek, on úsh jasynda ulǵa bólek otaý tikken. Qazaqta «on úshte otaý ıesi» degen sóz osydan shyqqan. Qyzdar otyryp qaldy, súrboıdaqtar kóbeıdi dep alańdaǵaly qashan. Ras, kári qyz ben súrboıdaqtyń máselesi qoǵamda kóldeneńnen tur. Alaıda elimizde erterek nekege turý dástúri de beleń alyp barady. Úıli-kúıli, otbasyly bolǵan jaqsy, árıne. Degenmen erte úılenýdiń ózindik mashaqaty da barshylyq. Erte shańyraq kóterýdiń qandaı mashaqaty bar ekendigin bilgińiz kelse «Aıqyn» gazetiniń senbilik sanynda jaryq kórgen «Erte úılenýdiń óz mashaqaty bar» degen taqyryptaǵy maqalaǵa nazar aýdaryńyz.
***
«Alash aınasy» gazetiniń turaqty «Dat!» aıdarynda Q.Qýanyshbaev atyndaǵy Qazaq kademııalyq mýzykalyq drama teatrynyń dırektory Erkin Jýasbekpen aradaǵy suhbat «Rýhanııatta júrgen jandardyń sanany oıatý jolyndaǵy jaýapkershiligin sezinetin kezi jetti» degen taqyryppen berilgen. Basylym tilshisiniń barlyq saýaldaryna tuşymdy jaýap bergen ol: «Keıingi kezde sana máselesi qabyrǵama qatty batyp júr. Ásirese, bul oı Jańaózendegi máselege qatysty údedi. Óner adamy retinde men ashýlaný degenniń ne ekenin, tartysqa túsýdiń ne ekenin zerttegim keledi. Sebebi sahnalyq oqıǵa eń aldymen tartystan turady», - deıdi.
***
«Memleket basshysy Nursultan Nazarbaevtyń atyna Prezıdent Nıkolıa Sarkozıden Qazaqstan men Frantsııa arasyndaǵy dıplomatııalyq qatynastardyń ornaǵanyna 20 jyl tolýyna baılanysty quttyqtaý hat kelip tústi», - dep jazady «Kazahstanskaıa pravda» gazeti. Basylymnyń jazýynsha, Nıkolıa Sarkozı qazaq-frantsýz yntymaqtastyǵynyń barlyq baǵytyndaǵy eleýli áleýetti atap ótip, Qazaqstan ekonomıkasyn jańǵyrtý jónindegi josparlardyń tabysty iske asatynyna senim bildirgen. «Men sońǵy jyldary bizdiń senimdi jaǵdaıda ótken turaqty kezdesýimiz seriktestik aıasynda edáýir nátıjelerge qol jetkizýge múmkindik bergenine qýanyshtymyn. Bizdiń kásiporyndar belsendi jumys júrgizýde. Men 2012 jyly jańa bıikterdi baǵyndyra alamyz dep senemin. Sizdiń qolaıly ýaqytta Astanaǵa taǵy da saparmen kelip qaıtý týraly shaqyrýyńyzdy qanaǵattanǵandyq sezimmen qabyl alamyn», - delingen hatta.