Áz Naýryzdyń erekshe salt-dástúri «Uıqyashar» men «Seltetkizer»
Sondyqtan da barlyq el osy túndi uıyqtamaı otyryp qarsy alyp, araılap atqan appaq tańdy, shýaǵyn shasha boı kótergen altyn kúndi alǵashqylardyń biri bolyp kórýdi jaqsylyqqa joryǵan. Káriler Táńirden duǵa tilep, bosaǵa attaǵan Jańa jyldyń jaıly, dastarhannyń maıly bolýyn, el-jurtynyń aman, zamanynyń tynysh bolýyn sol duǵa-tilekterine arqaý etken. Al jastar jaǵy túni boıy altybaqan teýip, aýyldyń alty aýyzyn aıtyp, qyz-jigitter bir-birimen oınap-kúlip ótkizgen. Úlkenderi joq úıge jınalyp, bastańǵy jasap, aq dastarqan basynda emin-erkin qaljyńdasyp, án-jyr aıtysyp, ózderinshe toılaǵan. Osy bir kóńildi de kórikti túnde jas jigitter unatqan qyzdaryna sóz salyp, bolashaq jaryn tabýǵa asyǵady. Al qyzdar jaǵy kóńil-qoshy aýǵan «serisine» emeýrin bildirý úshin, eń tátti-dámdi taǵamyn ázirleıdi. Mundaı yrdý-dyrdý túnde uıqy túgili sharshaýdy da oılamaǵan jigitke «Uıqyńdy ash» degen syltaýmen «Uıqyashar» usynady. Arý tarapynan kórsetilgen osyndaı qoshametke jigittiń beı-jaı qalýy ekitalaı. Sondyqtan olar da qarap qalmaı «Selt etkizer» degen nıetpen álgi arýǵa aına-taraq, alqa-syrǵa, sholpy-shashbaý syılaıdy. Osylaısha, kún men túnniń teńelgen shaǵynda jigit pen qyzdyń júrekteri de tabysyp, bolashaq úlken otbasyn qurýǵa alǵashqy qadam jasalady.
Mine, dál osylaı Ulystyń Uly kúniniń ajyramas bir bóligindeı ádemi salttarymyz ben ásem dástúrlerimiz qalyptasty. Qazaq halqy Jańa jylyn Qudaıǵa degen sheksiz yrzalyqpen, ólsheýsiz úmitpen, keleshekke degen zor mahabbatpen qarsy alǵan. Áz Naýryz osynysymen de erekshe, osynysymen de ómirsheń. Endigi jerde jastarymyz dál osy «Uıqyashar» men «Seltetkizerdi» qaıta jandandyryp, gazet pen saıt betterinde eske alatyndaı eski salt emes, shynaıy ómirimizdiń shashaýy shyqpaǵan bólshegindeı deńgeıge jetkizse degen úmitpen bıylǵy Ulystyń Uly kúnin qarsy alyp otyrmyz! Áz Naýryz qutty bolsyn, aǵaıyn!