Áz-Naýryz London tórinde

LONDON. QazAqparat - Áz-NaýryzUlybrıtanııa astanasynda da keńinen toılandy. London ortalyǵyndaǵy UCL (ıÝSıEl) ýnıversıteti aldynda sahna qurylyp, Ortalyq Azııa ókilderiniń qatysýymen kontsert ótti. Túrkitildes halyqtar ulttyq óneri men baı mádenıetin brıtanııalyqtar aldynda pash etti, dep habarlaıdy QazAqparat tilshisi.

Ortalyq Azııa elderiniń kóktem festıvali jyl saıyn uıymdastyrylady. Bul kúni Qazaqstan, Qyrǵyzstan, Túrikmenstan jáne basqa da memleketterdiń ónerpazdary sahnaǵa shyǵyp, jyrdan shashý shashady, myń burala bı bıleıdi. Dalada ózbek aǵaıyndar palaý pisirip, saýdasyn qyzdyrady.

Ýnıversıtet ǵımaratynyń ishinde de ulttyq taǵamdardan aýyz tııýge bolady. Haft Mıva - aýǵan halqynyń dámi. Іshine jeti túrli keptirilgen jemis pen jańǵaq qosylady. Biz biletin Naýryz kójeden aıyrmashylyǵy - bul ystyq sorpa emes, salqyn tátti sýsyn.

«Bizdiń mádenıetimizde jeti qasıetti san. Condyqtan Haft Mıvaǵa biz jeti túrli dám qosamyz. Bul asty tańerteń daıyn bolǵan ýaqytta ishseńiz óte jumsaq, dámdi ári nárli bolady», deıdi London turǵyny Nıýsha Nodýs.

Ulttyq kıimder men qolóner buıymdary da osynda. Estelikke kádesyılar satyp alýǵa bolady. Qazaqstandyq dızaınerlerdiń taqııalary men áshekeı buıymdary kelýshilerdiń kóńilinen shyqqandaı. Kezekte turǵandardyń qatary kóp.

«Jergilikti halyq, ásirese aǵylshyndar Qazaqstan týraly bile bermeıdi. Únemi Aýǵanstanmen shatastyrady. Olarǵa mádenıetimizde erekshelikter bar ekenin aıtamyn. Týǵan jerimiz týraly kóbirek bilip, saıahattaǵandaryn qalaımyn», deıdi London turǵyny Raýshan Baıspaı.

Syrtta Naýryznama, shat-shadymandy oıyn-saýyq, toı ótti. Túrkitildes halyqtar ǵasyrlar boıy urpaqtan-urpaqqa mıras etip kele jatqan mádenı muralarymen tanystyrdy. Ulttyq dástúrleri men ádet-ǵuryptaryn kórsetti. Qyrǵyzdar alastaý rásimin ótkizip, jyrdan shashý shashty.

«Qyrǵyz eliniń ulttyq aspaby qomyzdyń súıemeldeýimen uly demokrat aqynymyz Toqtaǵul Satylǵanovtyń «Álimhan» degen folklorlyq shyǵarmasyn oryndadym. Uıymdastyrýshylarǵa raqmet. Bul bizdiń yntymaǵymyzdy shyńdaıdy», deıdi London turǵyny Dilqumar Joldoshova.

Qazaqstandyqtar da ónerden kende emes ekendikterin tanytty. Sahnaǵa shyqqan stýdentterdiń eshqaısysy kásibı ánshi-bıshi bolmasa da halqymyzdyń ishki jan dúnıesiniń baılyǵyn yrǵaqty qozǵalystarymen «Qamajaı» bıi arqyly jetkizdi. Shámshiniń rııasyz sezimge toly lırıkalyq «Qaıyqta» ánin naqyshyna keltirip oryndady. Kishkentaı ónerpazdar da qalys qalmady. Úlken sahnaǵa shyǵyp, jınalǵandarǵa merekelik kóńil-kúı syılady.

«Biz Naýryzdy kórýge keldik. Ekseter qalasynan arnaıy 3,5 saǵat mashınamen júrip, endi osyndaı kórinisti kórý úshin keldik. Óıtkeni qazaqpyz ǵoı. Naýryz merekesi biz úshin ol kádimgideı ulttyq qundylyqqa toly, bizdiń ata-babamyzdan qalǵan, bizdiń rýhymyzdy kóteretin, eń basty merekelerdiń biri bolyp sanalady», deıdi Ekseter qalasynyń turǵyny, otandasymyz Samal Sabyrjan.

Tórt saǵatqa sozylǵan London tórindegi Naýryz merekesi aıaqtalsa da, halyq taraǵysy kelmeı uzaqqa deıin turdy. Barlyǵynyń tilegi bir: Naýryz merekesi árbir otbasyna birlik pen qýanysh, baqyt pen molshylyq ákelsin.