Aıjan Medeýova «páter» daýyna baılanysty óz erkimen qyzmetinen ketetinin jarııalady

ALMATY. QazAqparat - «Turǵyn úı qurylys jınaq banki» AQ tóraǵasynyń orynbasary Aıjan Medeýova búgin bank janyndaǵy Qoǵamdyq keńestiń otyrysynda óz erkimen qyzmetinen bosatý týraly ótinishin jetkizdi, dep habarlaıdy QazAqparat tilshisi atalǵan banktiń baspasóz hatshysy Aıbar Oljaıǵa silteme jasaı otyryp.

«Aıjan Medeýova Qoǵamdyq keńestegi sózinde óz atyna aıtylyp jatqan qaýesetter banktiń bedeline nuqsan keltirip jatqanyn eskerip, óz erkimen qyzmetinen ketý týraly sheshimin jarııalady. Onyń sheshimin banktiń basshysy qabyldaı almaıdy. Sebebi, Jarǵy boıynsha orynbasardyń qyzmetten ketý jónindegi usynysyn banktiń dırektorlar keńesi ǵana sheshedi. Endi osy usynys banktiń dırektorlar keńesinde osy aıdyń sońynda qaralmaq», - dedi Aıbar Oljaı.

Onyń aıtýynsha, Aıjan Medeýovanyń bul usynysyn Qoǵamdyq keńes qaperine aldy, sondaı-aq keńes músheleri orynbasardyń 13 jyl boıy bankte atqarǵan qyzmetin de atap ótti.

«Qoǵamdyq keńes Aıjan Medeýovanyń bankte 13 jyl atqarǵan qyzmetin atap ótip, rızashylyǵyn bildirdi. Bank tóraǵasy orynbasarynyń aımaqtaǵy jelilerdi qalyptastyrýdaǵy tájirıbesi óte zor, osy da eskerldi», - dedi Aıbar Oljaı. 

Aıta keteıik, buǵan deıin BAQ-tarda Medeýovanyń otbasy músheleri, naqtyraq aıtqanda, onyń týǵan sińlisi, burynǵy kúıeýi jáne ózi jeńildikpen úsh páter alǵany habarlanǵan bolatyn.