Aıjan Esmaǵambetova: Koronavırýspen aýrýhanaǵa túskenderdiń deni – vaktsına almaǵandar

ASTANA. QazAqparat – Elimizde COVID-19 vırýsynan em alyp jatqan naýqastardyń kóbi – vaktsına almaǵandar. Bul týraly Densaýlyq saqtaý vıtse-mınıstri, memlekettik bas sanıtarııalyq dáriger Aıjan Esmaǵambetova málim etti, dep habarlaıdy QazAqparat tilshisi.

«Koronavırýstan emdeý klınıkalyq hattamaǵa sáıkes júredi. COVID-19-dyń qandaı shtamy anyqtalsa da, emdeýde bir ádis qoldanylady. Aıta ketetin jaıt, Omıkron shtamynyń ereksheligi – 96% jaǵdaıda naýqas emhanada emdeledi, qalǵan 4% jaǵdaıda statsıonarǵa jatqyzylady. Búginde koronavırýs juqtyryp statsıonarǵa túsetinderdiń deni – vaktsına almaǵandar. Sonymen qatar, sozylmaly aýrýy barlar jáne júkti áıelder», - dedi Aıjan Esmaǵambetova OKQ-de ótken brıfıngide.

Vıtse-mınıstrdiń málimdeýinshe, qazir 1500-ge jýyq qazaqstandyq koronavırýstan em alyp jatyr. Onyń ishinde 300 patsıent statsıonarlyq jaǵdaıda, qalǵany emhana arqyly.

«Qazir ókpeni jasandy jeldetý apparatynda (IVL) 11 adam jáne 2 naýqasqa ınvazıvti emes jasandy jeldetý apparaty (NIVL) qosylǵan», - deıdi ol.

Buǵan deıin mınıstr orynbasary koronavırýstyń taralý jaǵdaıyna toqtalǵan edi. Aıjan Esmaǵambetovanyń aıtýynsha, jeltoqsan aıynda qarashamen salystyrǵanda koronavırýs juqtyrý 2,3 ese artqan.

Foto: ortcom.kz