Aıjan Esmaǵambetova Qazaqstanda qyzylshanyń taralý sebebin aıtty

<p>Densaýlyq saqtaý vıtse-mınıstri, memlekettik bas sanıtar dáriger Aıjan Esmaǵambetova Qazaqstanda qyzylshanyń taralaýyna ne sebep bolǵanyn túsindirdi, dep habarlaıdy <a href="https://kaz.inform.kz/" target="_blank" rel="noopener">Kazinform</a> agenttigi.</p>

«Qyzylsha óte juqpaly aýrý, kez kelgen juqpaly aýrý óziniń tsıkldiligimen sıpattalady, qyzylsha úshin tsıkldiligi shamamen 5-7 jyldy quraıdy. Bizdiń sońǵy ret osyndaı jaǵdaı 2019 jyly boldy, halyqty jappaı ımmýndaý da júrgizildi. Qazir elimizde qyzylshaǵa shaldyqqandardyń 60 paıyzy 5 jasqa deıingi balalar. Sondyqtan dál osy jas sanatyndaǵylarǵa qosymsha jappaı ımmýnızatsııa jasaý kerek», - dedi A.Esmaǵambetova Senattyń jalpy otyrysynan keıin tilshiler suraǵyna jaýap bere otyryp.

Aıta keteıik, Qazaqstanda qyzylshadan eki bala kóz jumǵany habarlandy. Bul oqıǵa Astana men Shyǵys Qazaqstan oblysynda boldy.

Elimizde qyzylsha ınfektsııasynyń taralýyna qarsy jappaı ımmýndaý júrip jatyr. Búginde qosymsha vaktsınalaýǵa jatatyn 1,5 mln adamnyń 608 myńnan astamy egildi, qamtý 40,5% qurady.