Aıyppuldar týraly SMS-eskertýler qashan iske qosylatyny anyqtaldy

 ASTANA. QazAqparat - QR Іshki ister mınıstriniń orynbasary Erlan Turǵymbaev jol erejesin buzý saldarynan keletin aıyppuldar týraly SMS-eskertýler júıesi qashan tolyqtaı iske qosylatynyn málim etti,  dep habarlaıdy QazAqparat.

«QR ІІM tarapy QR BP Quqyqtyq statıstıka jáne arnaıy esepke alý jónindegi komıtetimen, sondaı-aq «Azamattarǵa arnalǵan úkimet» memlekettik korporatsııasymen birlese elektrondyq úkimet portaly arqyly jınaqtalǵan aıyppuldar týraly azamattardy habarlandyrý sharalaryn iske asyryp jatyr», - dep toqtaldy Turǵymbaev.

Onyń atap ótýinshe, búginde halyqqa qyzmet kórsetý ortalyqtarynda arnaıy termınaldar ornatylǵan jáne osy qurylǵylar arqyly aıyppul týraly tolyq málimet alý múmkindigi bar.

«Munymen qosa, SMS-eskertýler jiberý arqyly halyqqa habar berý baǵytynda da jumystar júrip jatyr. SMS-eskerý boıynsha tıisti joba ázirlendi, júıe jumys istep tur. Alaıda 100 paıyz deńgeıde qamtý tek 2019 jyldyń 1 qańtarynan bastap iske asyrylady. Atap aıtqanda, el turǵyndarynyń uıaly telefondaryn tirkeý IMEI-kodpen tolyqtaı júrgizilgennen keıin, aıyppuldar týraly málimettermen azamattardy 100 paıyz qamtı alamyz», - dep túıdi mınıstrdiń orynbasary.