Aıyppul tólemegenderge SMS-habarlamamen eskertý jiberilmek
17:11, 27 Qarasha 2014
ASTANA. QazAqparat - Ákimshilik aıyppul tóleý týraly eskertý úshin telefon, uıaly baılanys pen ınternet qyzmeti usynylady. Búgin Zańdylyq, quqyqtyq tártipti jáne qylmysqa qarsy kúresti úılestirý keńesiniń otyrysynda QR Bas prokýrory Ashat Daýylbaev osyndaı usynys jasady.
«Búgin úılestirý keńesiniń otyrysynda quqyq buzýshylarǵa aıyppul jóninde eskertýge qatysty habarlamalardyń jańa túrlerin engizý týraly birqatar usynystar aıtyldy. Atap aıtqanda, telefonogramma, SMS-habarlama, uıaly baılanys arnalary men elektrondyq poshtalar boıynsha habarlamalar jiberý aıtyldy. Úılestirý keńesiniń múshelerinen bulardy qoldaýdy suraımyn», - dedi Ashat Daýylbaev.
Budan bólek, Bas prokýror aıyppuldardy ınternet arqyly bankter usynatyn lezde tóleý qyzmetterin paıdalaný jolymen jabý múmkindigin qarastyrýdy alǵa tartady.
Eske sala keteıik, Bas prokýrordyń málimetine qaraǵanda, sońǵy bes jylda elimizde aıyppuldar boıynsha oryndalmaǵan qaýlylar eki esege artqan, al óndirilmegen aıyppuldar mólsheri 200 mıllıard teńgeden asty.