Aıyppul óndirýdegi bylyqtar qoldan uıymdastyrylyp otyr - Bas prokýror
Ashat Daýylbaevtyń aıtýyna qaraǵanda, aıyppuldardy óndirýdiń tómen kórsetkishi negizinen ýákiletti organdar tarapynan jyl saıyn qaıtalanyp otyrǵan júıeli buzýshylyqtardyń saldarynan týyndaǵan. Atap aıtqanda, tıisti organdar zań buzýshylardyń tabys kózderin anyqtaý sharalaryn qoldanbaıdy, al shyǵarylǵan qaýlylar sot oryndaýshylaryna olardyń tólem qabilettiligi aldyn ala tekserilmesten jiberiledi. Óz kezeginde sot oryndaýshylary ondaı materıaldardy keri qaıtaryp, saldarynan qaǵazbastylyqqa jol beriledi. Budan bólek, sot oryndaýshylary tarapynan óreskel buzýshylyqtar da oryn alǵan.
«Bıylǵy jyly sot oryndaýshylaryna ýákiletti organdar tarapynan jalpy somasy 40 mlrd. teńgeden asatyn 700 myń qaýly jiberildi, bulardyń eshqaısysynda quqyq buzýshylardyń tabysy tekserilmegen. Bunymen qosa, keı jaǵdaıda qaýlylardyń aıtarlyqtaı bóligi oryndaýǵa joldanbastan, jyldar boıy ýákiletti organdarda saqtalyp jatyp qalady. Uzaq jyldar boıy jatqan qaýlylar joǵalyp qana qoımaı, ádeıi joıylady, tipti keı jaǵdaıda burmalanady. Máselen, aǵymdaǵy jyly prokýrorlar ýákiletti organdarda «qozǵalmastan» jatyp qalǵan 1,5 mıllıard teńgeni quraıtyn 150 myńnan astam materıaldardy anyqtady. Osylaısha, aıyppul óndirý úderisinde bylyqtar qoldan uıymdastyrylyp otyr», - dedi A.Daýylbaev.
Onyń aıtýynsha, ýákiletti organdar tarapynan statıstıkalyq málimetterdi ádeıi tómendetý faktileri de anyqtalǵan.
«Máselen, Almaty qalasynyń bir ǵana ákimshilik polıtsııa basqarmasy 6 aıdyń ishinde 600 mln. teńgeniń 95 myń qaýlysyn esepke tirkeýden jasyryp qalǵan», - dedi Bas prokýror.