Aıý talaǵan SQO turǵyny qolynan aıyryldy

PETROPAVL. QazAqparat – Soltústik Qazaqstan oblysyndaǵy haıýanattar baǵynda aıýdy tamaqtandyrmaq bolǵan er adamnyń qolyn ampýtatsııalaýǵa týra keldi. Dárigerler qazir onyń ekinshi qolyn aman alyp qalý úshin kúresip jatyr, dep habarlaıdy QazAqparat tilshisi.

SQO polıtsııa departamenti baspasóz qyzmetiniń málimetinshe, oqys oqıǵa 30 maýsym kúni Qyzyljar aýdany «Abakshıno» demalys aımaǵy aýmaǵyndaǵy haıýanattar baǵynda bolǵan. Aýdandyq polıtsııa bólimine er adamǵa aıýdyń shabýyl jasaǵany týraly habarlama túsken.

Jedel járdem brıgadasy zardap shegýshige medıtsınalyq kómek kórsetti, sodan keıin ol aýrýhanaǵa jatqyzyldy. Kóp qan joǵaltqan er adamnyń bir qolyn ampýtatsııalaýǵa týra keldi, dárigerler qazirgi ýaqytta ekinshi qolyn aman saqtap qalý úshin kúresip jatyr.

«Jedel-tergeý tobynyń qyzmetkerleri oqıǵanyń mán-jaıyn anyqtady. Zardap shekken 43 jastaǵy er adam 6 maýsymda osy demalys aımaǵyna synaq merzimine jumysqa qabyldanǵan. Onyń mindetine aýmaqty jınaý jáne janýarlardy azyqtandyrý kirgen. Atalǵan fakt QR Qylmystyq kodeksiniń 156-babynyń 2-bóligi boıynsha sotqa deıingi tergep-tekserýlerdiń biryńǵaı tiziliminde tirkeldi», - delingen baspasóz habarlamasynda.

Qazirgi ýaqytta istiń barlyq mán-jaılaryn zertteýge baǵyttalǵan tergeý áreketteri júrgizilip jatyr, olardyń nátıjesi boıynsha túpkilikti protsestik sheshim qabyldanady.