Aıtyp kelmegen alapat órt: ShQO-daǵy qyzyl jalynmen kúres qalaı júrgizildi
Qas pen kózdiń arasynda
10 mamyr kúni tústen keıin Rıdder orman sharýashylyǵynda shóp órtenip jatqanyn baıqaǵan Leshoz kentiniń turǵyndary «101» qyzmetine habarlasqan. Oqıǵa ornyna órt sóndirýshiler jedel keldi. Áýelde tilsiz jaýmen kúreske 6 tehnıka men jeke quramnan 100-den astam adam jumyldyrylǵan-tuǵyn. Alaıda órtti óshirýge ekpini sekýndyna 20 metrge jetetin qatty jel kedergi keltirdi.
Jyldam taraǵan jalyn kóp uzamaı jaqyn mańdaǵy kentke de jetti. Turǵyn úıler otqa orandy. Qutqarýshylarǵa kómek kórsetý úshin oqıǵa ornyna ormanshylar, polıtsııa qyzmetkerleri men jergilikti atqarýshy organ ókilderi umtyldy. Órttiń saldarynan 1949 jáne 1980 jylǵy eki er adamdy kúıik shalyp, jergilikti aýrýhanaǵanyń jansaqtaý bólimine jetkizildi. Al tártip saqshylary 1948 jyly týǵan áıeldiń máıitin tapqan. Jalpy aýmaǵy 300 gektardan asqan qyzyl jalynmen kúres túni boıy júrgizildi.
Áıteýir kelesi kúni tańǵy saǵat 7:00-de Leshoz kentindegi úılerdi sharpyǵan órt tolyqtaı sóndirildi. Biraq ormanda tilsiz jaýdyń beti qaıtpaǵan. Sol kezde tikushaqpen barlaý barysynda ashyq janyp jatqan jalyn baıqalmaǵan edi.
Shyǵystaǵy alapat órt jaıly muqym respýblıka jurtshylyǵy estip, máseleni Prezıdent Qasym-Jomart Toqaev óz baqylaýynda aldy. Memleket basshysy Úkimet pen Shyǵys Qazaqstan oblysynyń ákimdigine zardap shekken turǵyndarǵa kómek kórsetip, baspanamen qamtamasyz etýdi tapsyrdy.
Anyqtalǵandaı, qyzyl jalynnyń saldarynan 31 úı qırap, 5 avtokólik, 7 sharýa qojalyǵy jáne tehnıkalyq qyzmet kórsetý stantsııasy janyp ketken. Órtengen úılerde 72 adam turǵan, onyń ishinde 11 bala bar. Qazirgi ýaqytta 13 azamat «Qazmyrysh» JShS jataqhanasyna, qalǵandary týystarynyń úılerine ornalastyrylǵan.
– Rıdder orman sharýashylyǵy aýmaǵynda shyqqan tilsiz jaý 11 mamyrda saǵat 18.20-da aýyzdyqtaldy. Órtti sóndirýge jeke quramnan 493 adam, 69 tehnıka, 2 tikushaq jumyldyrylǵan, – dep habarlady ShQO Tótenshe jaǵdaılar departamentiniń baspasóz qyzmeti.
Jańa úıler jazda beriledi
Aımaq basshysy Danıal Ahmetov órtten zardap shekken turǵyndarmen kezdesti. Óz sózinde ol tamyz aıynyń sońyna deıin baspanasyz qalǵandardyń árqaısysyna jańa úıdiń kilti beriletinin jetkizdi. Bes qurylys kompanııasy Botanıka yqshamaýdanynda jeti úıden turǵyzady. Búginde oqıǵa ornynda komıssııa músheleri jumys isteýde. Olar naqty keltirilgen materıaldyq zalal mólsherin eseptep, azamattarǵa qujattaryn qalpyna keltirýge septigin tıgizedi.
– Buzylǵan úılerdi qalpyna keltirmeımiz. Úıinen aıyrylǵan ár adamǵa 80 sharshy metrlik baspana beriledi. Áýelde qurylysy aıaqtalmaǵan 9 qabatty turǵyn úıdi satyp alý josparlanǵan bolatyn. Alaıda 1996 jylǵy úıdiń ishi árlenbegen ári qajetti kommýnıkatsııa tartylmaǵan. Onyń ıesi sharshy metri úshin 179 myń teńge surap otyr. Al jeke sektordaǵy jańa úıdiń sharshy metriniń quny – 160 myń teńge. Bul bıýdjet qarjysyna da únem bolady. Úıler turǵyndarǵa esh aqysyz beriledi. Sáýletshiler 35 úı aýmaǵyn bólgen soń birden qurylys jumystary bastalmaq, – dedi Danıal Ahmetov.
Abaısyzdyqtan bolǵan aýyr saldar
ShQO Óńirlik kommýnıkatsııalar qyzmetinde ótken baspasóz máslıhaty barysynda ShQO Polıtsııa departamenti bastyǵynyń orynbasary Eldos Zakımov dala órtine baılanysty sot saraptamalary taǵaıyndalǵanyn jetkizdi.
– Polıtsııa qyzmetkerleri alapat órtke baılanysty QR Qylmystyq Kodeksiniń 204-baby 2-bóligine sáıkes (otpen abaısyz jumys isteý arqyly jasalǵan ne aýyr zardaptarǵa ákep soqqan nemese asa iri zalal keltirý) sotqa deıingi tergeý amaldaryn bastady. Atalǵan bap boıynsha 2 myń AEK-ke deıingi mólsherde aıyppul salý nemese eki jylǵa deıingi merzimge bas bostandyǵynan aıyrý túrindegi jaza qarastyrylǵan. Kúdikti retinde buryn sotty bolmaǵan 35 jastaǵy Rıdder qalasynyń turǵyny ustaldy. Onyń abaısyzdyǵy osyndaı aýyr saldarǵa ákep soqty, – dedi ol.
Arnaıy qurylǵan jedel-tergeý tobynyń qyzmetkerleri beınejazbalardy zerdelep, kýálardyń jaýaptaryn muqııat tekserýde. Qylmystyq istiń tergelýi QR Іshki ister mınıstriniń baqylaýyna alynǵan.
Qaıyrymdylyq aktsııasy qolǵa alyndy
Órttiń saldarynan baspanasyz qalǵan otbasylarǵa kómek kórsetýge baǵyttalǵan «Rıdder, biz birgemiz!» aktsııasy bastaldy. ShQO-daǵy barlyq qala-aýdan ákimdikteriniń, basqarmalar men memlekettik mekemelerdiń qyzmetkerleri bir kúndik jalaqylaryn «Birlik» qoryna aýdarýda.
– Oblys boıynsha órtten zardap shekkenderge gýmanıtarlyq kómek jınaý naýqany uıymdastyryldy. «Nur Otan« partııasynyń Shyǵys Qazaqstan oblystyq fılıaly Birgemiz aktsııasyn jarııalady, aktsııa sheńberinde birinshi qajettiliktegi zattar, qurylys materıaldary jınaqtalýda. Sonymen qatar óńirlik Kásipkerler palatasy bıznes ókilderin áleýmettik jaýapkershilik kórsetip, rıdderlikterge qoldan kelgenshe kómek kórsetýge shaqyrdy, – dep habarlady ShQO Aqparat ortalyǵy.
Oblys dinbasylary «Qaıyrymdy bolsań, qaıyrymyn óziń kóresiń» aktsııasyn qolǵa alǵan. Azyq-túlik, aqshalaı qarajat, kıim-keshek syndy zattar Halıfa Altaı meshitinde, sondaı-aq oblystyń qalalary men aýdandarynyń meshitterinde qabyldanady. ShQO QHA jáne D. Serikbaev atyndaǵy ShQTÝ-dyń «Jaqsylyqty birge jasaımyz» eriktiler qozǵalysy qalaǵa gýmanıtarlyq kómek jiberdi.
Budan bólek, áleýmettik jelide oblys ákimdiginiń atyna óńirdiń bul jaǵdaıǵa beı-jaı qaramaıtyn azamattarynan da hattar kelip túsýde. Máselen, óskemendik kásipker Isataı Ansat ákimshilik ǵımarat pen ýchaskesiniń qajetti bóligin turǵyn úı retinde jóndeý jumystaryn júrgizip, odan keıin zardap shekken otbasylarynyń menshigine berý úshin tegin beretini týraly nıetin bildirgen hat jarııalady. Habarlamada aıtylǵandaı, bul shamamen 3800 sharshy metr ákimshilik ǵımarattan turatyn burynǵy áskerı bólimniń ǵımaraty. Al «Qazmyrysh» kompanııasy úıleri órtenip ketken barlyq otbasylarǵa 1 mıllıon teńgeden bólinetinin jetkizgen.
Aıta keteıik, zardap shekkenderge materıaldyq qarajat jınaý úshin «Birlik» qory ashylǵan. Qolushyn sozamyn deýshiler bolsa kelesi shotqa aqsha joldaı alady: KZ094809KZT22031440, JSN (BSN) 141140013670.