Aısulý Moldııarova: World Skills qozǵalysynyń arqasynda kásiptik bilim berý sapasy artýda

SEMEI. QazAqparat – Semeı qalasyndaǵy Elektrotehnıkalyq kolledj dırektorynyń orynbasary Aısulý Moldııarova kásiptik bilim berýde World Skills qozǵalysy rólin kúsheıtýdiń mańyzdylyǵyn aıtyp berdi, dep habarlaıdy QazAqparat tilshisi.

«WorldSkills – 80-nen astam eldi biriktiretin jahandyq qozǵalys. Onyń maqsaty – kásiptik bilim berý sapasyn jáne jumysshy mamandyqtarynyń bedelin arttyrý. Qozǵalystyń arqasynda kásiptik oqytý standartyn kóterýdiń, kásibı daǵdylardy baǵalaý men damytýdyń, kadrlardy daıarlaý salasyndaǵy memlekettik saıasatty iske asyrýdyń múmkindikteri artty», - dedi Aısulý Moldııarova.

Onyń aıtýynsha, qozǵalysqa qatysýshylar – 22 jasqa deıingi jastar, atap aıtqanda kolledjder men joǵary oqý oryndarynyń stýdentteri, kásiporyndardyń jas qyzmetkerleri. 2014 jyldan bastap Qazaqstan WorldSkills International-dyń tolyqqandy múshesi boldy.

«2021 jyly World Skills qozǵalysyna qatysty Eýrazııalyq álem chempıonaty ótti. Oǵan Qazaqstan quramasy 9 quzyrettilik boıynsha qatysty. Chempıonat barysynda stýdentterimiz Reseı, Belarýs, Qytaı, Ázirbaıjan, Qyrǵyzstan, Tájikstan, Ózbekstan, Úndistan, Iran komandalarymen saıysqa túsip, 7 quzyrettilik, atap aıtqanda «Elektromontajdy jumys», «Grafıkalyq dızaın», «Shashtaraz óneri» «Keskindeme jáne sándik jumys», «Bızneske arnalǵan baǵdarlamalyq sheshimder», «Kondıterlik ónimder jáne bıznes», «Sán tehnologııalary» boıynsha 2 kúmis jáne 5 qola medal ıelendi», - dedi kolledj dırektorynyń orynbasary.

Onyń sózinshe, Shyǵys Qazaqstan oblysynyń komandasy WorldSkills quzyrettilikterin qamtý jaǵynan birneshe jyl boıy elimizde kósh bastap keledi. Sondaı-aq respýblıkalyq chempıonattarda birneshe ret jalpy komandalyq esepte 1-orynǵa ıe bolǵan. Elektrotehnıkalyq kolledj komandasy oblys quramasynyń qatarynda buǵan deıin de respýblıkalyq chempıonattarǵa qatysyp, júldeli oryndardy ıelenip keledi.

«Qazir biz WorldSkills qozǵalysy boıynsha Qazaqstannyń basqa óńirlerindegi, Germanııadaǵy, Reseıdegi, Belarýs jáne Brazılııadaǵy áriptestermen birlesip jumys istep, mol tájirıbe jınaqtadyq. Atqarylǵan jumystar oń nátıjelerge qol jetkizýge, jastar arasynda jumysshy mamandyqtarynyń ımıdjin arttyrýǵa múmkindik beredi dep senemiz», - dedi Aısulý Moldııarova.