Aısholpannyń izin basqan taǵy 3 búrkitshi qyz ósip keledi

ASTANA. QazAqparat - Rejısser Otto Bell túsirgen «The Eagle Huntress» derekti fılminiń basty keıipkeri, Mońǵolııanyń qazaǵy Aısholpan Nurǵaıyp óz sińlisin búrkitshilikke baýlyp júr. Bul týraly Aısholpan sheteldik BAQ-qa bergen suhbatynda habarlady. Aısholpan osymen úshinshi ret AQSh-qa bardy. Ol joq kezde búrkitine aǵasy qaraılaıdy. Aısholpannyń ózi baýlyǵan búrkitti 3 jyl buryn qolǵa úıretken, oǵan deıin ańshy qyz ákesiniń búrkitimen ańǵa shyqqan.

Aısholpannyń aıtýynsha, ol Mońǵolııada óte tanymal búrkitshige aınalǵan. «Mońǵolııa halqy fılmdi áli kórgen joq jáne kórýdi armandap júr. Ózimdi úlken ekrannan kórýge qysylyp júrmin», - dedi boıjetken.
Mońǵolııada ótken búrkitshiler festıvalindegi Aısholpannyń jetistiginen soń, erler qaýymy búrkitshilikti áıeldiń isi emes dep aıtýdy doǵardy. «Ótken jyly festıvalge taǵy bir búrkitshi qyz kelse, bıyl ekeýi shyqqan. Sonda, Mońǵolııada tórt búrkitshi qyz bar», - deıdi Aısholpan. Jyl saıyn jergilikti qazaqtar Baıan Ólgeıdegi búrkitshiler festıvaline qatysyp, óz qustarynyń qarym-qabiletin kórsetedi.
Aıta keteıik, amerıkalyq kınoakademııa «Búrkitshi qyz» fılmin «Oskar» syılyǵyna úmitkerlerdiń qataryna qosty. Basty keıipker Aısholpan Nurǵaıyp búrkitshi kásibin ıgerip, ata-baba dástúrin jalǵastyryp keledi. Álem boıynsha, eki qyz bala ǵana búrkitshilikpen aınalysady. Ekeýi de qazaq qyzdary. Onyń biri Qazaqstanda turady. Ol - Maqpal Ábdirazaqova. Oskarǵa úmitkerler tiziminde 15 fılm bar. Jarııalanǵan fılmder arasynan eń úzdik beseýi tańdalady jáne aqtyq synǵa túsedi. Baıqaý qorytyndysy 24 qańtarda belgili bolmaq.
Eske sala ketsek, tanymal ánshi Sia mońǵolııalyq búrkitshi qazaq qyzy Aısholpan Nurǵaıyp týraly fılmniń saýndtregi «Angel by the Wings» atty jańa án jazdy.