Aısholpandy halyqaralyq jarystarda qarjylaı qoldaýǵa daıynbyz - mınıstr
«Ózderińiz bilesizder, Elbasymyzdyń «Rýhanı jańǵyrý» baǵdarlamasy osydan bir jyl buryn jarııa etilgende barsha Qazaqstan halqy qýanǵan bolatyn. Óıtkeni, osy ýaqytqa deıin saqtalǵan ata-dástúrimizdi, qasıetterimizdi nasıhattaýǵa, qazirgi jetken jetistikterimizdi dúnıejúzine pash etýge múmkindik berdi. Osy rette kóneden kele jatqan saıatshylyq ónerimizdi búkil álemge tanytyp, barlyǵyn tań qaldyryp júrgen Aısholpanǵa alǵysymyzdy bildiremiz», - dedi mınıstr.
Sonymen qatar Arystanbek Muhamedıuly elimizde ulttyq sportty damytý baǵytynda júrgizilip jatqan jumystarǵa toqtaldy.
«Osydan eki jyl buryn ulttyq sport túrlerin damytý ortalyǵyn ashtyq. Ótken jyly EKSPO aıasynda kókpardan dúnıejúzilik chempıonat ótip, oǵan Amerıkadan, Vengrııadan, jalpy kóptegen elderden kókparshylar qatysyp, barynsha qyzyqty boldy. Biz elimizdiń ulttyq sport túrlerin damytý úshin kóptegen shara ótkizip turamyz. Soǵan qatysqanyńdy qalaımyz. Oblystarǵa shyǵýǵa da kómek beremiz. Halyqaralyq jarystarǵa qatysamyn deseń, jol qarajaty syndy shyǵyndaryńdy óteýge daıynbyz», - dedi mınıstr Aısholpanǵa qarata.
Ulttyq jáne at sporty túrleri ortalyǵynyń dırektory Nursultan Ibragımov Aısholpannyń bir ańshylyq maýsymda 14 túlki men 2 qasqyr alǵanyn atap ótti.
«Bul úlken jetistik. Osyndaı tájirıbeni bizdiń aǵa jattyqtyrýshylarymyzǵa, jalpy qusbegilikti serik etken sportshylarǵa úlgi retinde úıretip, sheberlik sabaqtaryn ótkizse degen usynysymyz bar. Qýana qarsy alamyz. Qarasha aıynda búrkitshilerdiń halyqaralyq jarysy Qazaqstan jerinde ótedi. Oǵan Mońǵolııa jerinen 10-nan astam búrkitshi qatysady degen jospar bar», - dedi ol.
Al Aısholpan pen anasy Almagúl Kóksegen arnaıy qabyldap, qonaqjaılyq tanytqan mınıstr Arystanbek Muhamedıulyna rızashylyǵyn bildirdi.
Kezdesýge qatysqan «Bilim-Innovatsııa» xalyqaralyq qoǵamdyq qorynyń prezıdenti Darxan Ermaxanulynyń aıtýynsha, Aısholpan búginge deıin álemniń 30-dan astam elin aralap, AQSh-ta 8 márte bolǵan eken. Degenmen, ol suhbattarynyń birinde ata jurty Qazaqstanǵa barýdy armandaǵandyǵyn aıtqan.
«Biz sol armanyn oryndaý maqsatynda Qazaqstanǵa alyp keldik. Munan bólek, Aısholpan Garvard, Oksford ýnıversıtetterinen shaqyrtý alǵan bolatyn. Sol úshin Spectrum xalyqaralyq mektebinde oqytyp, tildik deńgeıin, akademııalyq bilimin jetildirmek oıymyzda bar. Ol úshin arnaıy baǵdarlama ázirleımiz. Usynysymyzdy ata-analary qarastyryp jatyr», - dedi Darhan Ermahanuly.
Júzdesý sońynda Arystanbek Muhamedıuly Aısholpanǵa Ipad, al anasyna kamzol syıǵa tartty. Aısholpan da mınıstrge tasqa qashalyp salynǵan sýret syılady.