«Aınalym shemasy» óziniń tıimdiligin kórsetti – Baqyt Sultanov
«Búgingi tańda ınflıatsııa men ımportqa suranystyń artýyna baılanysty jańa jaǵdaıda, pandemııalyq jáne geosaıası shekteýler nátıjesinde «Aınalym shemasy» óziniń tıimdiligin kórsetti. Tikeleı óndirýshilerge aınalym jáne ınvestıtsııalyq qarjylandyrý memlekettiń bıznesti qoldaý jónindegi birqatar baǵdarlamalarynda júzege asyrylady», - dedi mınıstr Úkimet úıinde ótken baspasóz máslıhatynda.
Onyń aıtýynsha, «aınalym shemasynyń» mindeti jergilikti atqarýshy organdar atynan áleýmettik kásipkerlik korporatsııa, áleýmettik mańyzy bar azyq-túlik taýarlaryn óndirýshiler men ónim berýshileriniń, saýda jelileriniń ónimdi jetkizý merzimderin, kólemderi men baǵalaryn tirkeıtin ózara mindettemelerin bekitýden turady.
«Birneshe mysal keltireıin, máselen, Qaraǵandy oblysynda 2 709 tonna kartop jetkizýge bólshek saýdada belgilengen 85 teńge baǵasymen kelisimshart sáýir aıynda jasaldy, al kommertsııalyq baǵa sol ýaqytta 175 teńge edi. Nátıjesinde oblysta kartop satýdyń eń tómengi baǵasy 135 teńgeni kórsetti. Qyryqqabat boıynsha da osyndaı jumystar júrgizildi, Túrkistan oblysynan erte eginniń óńiraralyq aǵyndary jolǵa qoıyldy. Naryqty toltyrý qorytyndysy boıynsha kelisimshart jasalǵan ónimmen baǵanyń eń joǵary ósimin 273 teńgeden 124 teńgege deıin tómendetý múmkin boldy», - dedi B. Sultanov.
Atalǵan jumys barlyq óńirler boıynsha júrgizilgen, osyǵan baılanysty qazir ónim baǵasynyń birtindep tómendeýi baıqalyp otyr.
«Sonymen birge, bul mehanızmdi Prezıdent synǵa aldy, sebebi atalǵan mindetti iske asyrýdyń tıimdiligin arttyrý bóliginde pysyqtaý qajet etiledi. Apta saıynǵy tsıfrlyq Úkimet keńsesinde jergilikti atqarýshy organdarmen selektorlyq keńes ótetin aqparattyq júıe boıynsha pysyqtaý jumystary júrgizilýde. Naryq qatysýshylary belgileıtin naqty baǵalar týraly halyq pen bıznesti barynsha aqparattandyrý qamtamasyz etiledi, saýda jelileriniń, óndirýshiler men jetkizýshilerdiń tıimdiligin arttyrý kózdeledi. Ekinshi jaǵynan, jalpy taýar aınalymyndaǵy áleýmettik mańyzy bar ónimderdiń «aınalym shemasyn» qarjylandyrý kólemi 4%-ti ǵana quraıdy. Sondyqtan ol naryqqa tolyq áser ete almaıdy. Osyǵan baılanysty, qarajat qozǵalysy ashyqtyǵynyń jáne olardyń tıimdiliginiń artýyna baılanysty qarjylandyrý birtindep ulǵaıady», - dep túsindirdi B. Sultanov.
Keshe Úkimettiń keńeıtilgen otyrysynda Prezıdent Qasym-Jomart Toqaev kóterme-taratý ortalyqtary jelilerin iske qosý jumystary uzaqqa sozylyp ketkenin synaǵan edi.
https://kaz.inform.kz/news/prezident-koterme-taratu-ortalyktary-zhelilerin-iske-kosu-zhumystaryn-synady_a3954634