Aıman Musaqojaeva: Nursultan Nazarbaev qazaqtyń ulttyq mádenıetiniń damýyna orasan zor eńbek sińirgen tulǵa
«Nursultan Nazarbaev memleket basshysy retinde Qazaqstannyń bolashaǵyn naqty kóre bilgen tulǵa. Táýelsizdik alǵan jyldary Qazaqstanǵa dál osyndaı kóshbasshy kerek edi. Onyń barlyq reformasy halyqtyń ómir súrý sapasyn jaqsartýǵa baǵyttaldy. Óz basym Nursultan Ábishulyn qazaqtyń ulttyq mádenıetiniń damýyna orasan zor eńbek sińirgen tulǵa dep esepteımin. Onyń qoldaýymen Qazaq ulttyq mýzyka akademııasyn uıymdastyrýǵa múmkindik týdy. Osy ınstıtýttyń negizinde Qazaq ulttyq óner ýnıversıteti quryldy», - dedi Aıman Musaqojaeva.
Professordyń aıtýyna qaraǵanda Nursultan Nazarbaev Qazaqstan astanasynda daryndy jastardyń túleýine barlyq jaǵdaıdy jasaǵan.
«Bizde shyǵarmashylyqtyń barlyq salasy - mýzyka, kıno, teatr, óner jáne taǵy basqa sala úshin mamandar daıarlaý múmkindigi týdy. Reseıdiń, Italııanyń, Ispanııanyń, AQSh-tyń jáne basqa elderdiń jetekshi ýnıversıtetterimen jasalǵan halyqaralyq yntymaqtastyq baǵdarlamalary ónerdiń túrli salalary boıynsha bilikti mamandardy daıarlaýǵa kómektesedi», - dedi Halyq ártisi.
Qazaq ulttyq óner ýnıversıtetiniń rektory ózi jetekshilik etip otyrǵan ýnıversıtettiń ashylýynda Nursultan Nazarbaev «jańa ǵımaratta shyǵarmashylyq rýhtyń kóterilip, túlekterdiń Qazaqstandy dańqqa bóleýin tilegenin» aıtady.
«Qazir Qazaq ulttyq óner ýnıversıteti - shyǵarmashylyq belsendiligi damyǵan kórkem oqý orny. Onda festıvalder, konkýrstar, kontsertter, kórmeler, spektaklder, sheberlik synyptary sııaqty sharalar ótip jatady. Uıymdastyrý zalynda, Erkeǵalı Rahmadıev atyndaǵy jáne Jambyl Jabaev atyndaǵy úlken zalda, Frederık Shopen atyndaǵy kishi zalda shyǵarmashylyq keshter únemi ótkizilip turady. Ár jastaǵy QazUÓÝ stýdentteri, kolledj jáne ýnıversıtet ujymdary, oqytýshylar men professorlar, shaqyrylǵan solıster, dırıjerler jáne toptar óz ónerlerin pash etedi. Óner ýnıversıtetiniń qyzyqty kontserti kópshilikti ár túrli stıl men baǵyttyń mýzykasymen tanystyrady. Qazirgi ýaqytta QazUÓÝ-de 30-ǵa jýyq shyǵarmashylyq top jumys isteıdi. Olardyń qatarynda Eýrazııalyq stýdentterdiń sımfonııalyq orkestri, Qazaq stýdenttik folklorlyq orkestri, «Kaprıchıchı» skrıpka ansambli, «Aıgólek» skrıpka ansambli, «Shabyt» halyq ansambli, «Shabyt-ansambl» dombyrashylar ansambli, «Tlep» qobyzshylary, «Jas-Star» ansambli, «ıApuraı» vıolonchelıster ansambli, Stýdenttik hor kapellasy, QazUÓÝ-diń úrmeli orkestri, BBayan.kz ansambli, «Kazakh Percussion Group» barabanshylar ansambli, «Mýzykalyq bilim» mamandyǵy hory, Oqý kınoteatry, QazUÓÝ stýdııasy bar», - dep tizip berdi Aıman Musaqojaeva.
Stýdentterdiń joǵary kásibı sheberliginiń kórsetkishi ýnıversıtettiń ataǵyn aspandata túsken.
«Sonymen qatar, men Qazaqstanda baǵa jetpes aspap - XVII ǵasyrdyń sońynda jasalǵan uly ıtalıandyq sheber Stradıvarıdiń skrıpkasy bar ekenin atap ótkim keledi. Álem tarıhynyń bul qundy artefakty Nursultan Ábishuly Nazarbaevtyń arqasynda elge ákelingen. Búgingi tańda Stradıvarıdiń júzden az skrıpkasy búkil álemde saqtalǵan. Olardyń biri bizdiń elimizde. Barlyq álem katalogtarynda onyń ıesi Qazaqstan Respýblıkasy, biregeı aspaptar memlekettik jınaǵy jáne Qazaqstan Respýblıkasynyń Memlekettik murajaıy ekendigi jazylǵan. Bul skrıpka ár túrli elderde bizdiń mádenıetti beıneleıdi. Men Prezıdent Nursultan Nazarbaevqa Táýelsizdiktiń barlyq jyldarynda eldegi kóptegen mádenı jobaǵa qoldaý kórsetkeni úshin úlken alǵysymdy aıtamyn», - dep qorytyndylady Aıman Musaqojaeva.