Aıman Musaqojaeva men Dımash Qudaıbergen frantsýz halqyn erekshe yqylasqa bóledi
Talantty ártister elimizdiń ókilderi retinde Astana men QazUÓÝ 20-jyldyq mereıtoıy qarsańynda ótetin «Eýrazııa» HKF tanytý maqsatynda óner kórsetti.
«Eýrazııa» kınofestıvali ̶ 1998 jyly negizi qalanyp, FIAPF (Halyqaralyq kınoprodıýserler qaýymdastyǵy federatsııasy) akkredıtatsııadan ótken jáne bedeldi brıtandyq International FilmGuide basylymy álemniń 35 tanymal kınofestıvalder qataryna engizilgen.
Halyqaralyq «Eýrazııa» kınofestıvaliniń Prezıdenti Aıman Musaqojaeva Kanndaǵy Qazaq mádenıeti keshinde bylaı dedi:
«Eýrazııa» kınofestıvalinde otandyq fılmderdi keńinen taratý, kınojobalar men qyzmetterdi usyný jáne kelissózder júrgizýge múmkindik beredi. Qazaqstan rejısserleri tek otandyq kınorynokty ıgerip qoımaı, halyqaralyq kınojıyndarda da óz týyndylaryn batyl usynyp jatyr. Bıyl Kann kınofestıvaliniń «Erekshe kózqaras» baǵdarlamasynda Ádiljan Erjanov «Laskovoe bezrazlıchıe mıra» fılmimen qatysyp otyr. Al Jannat Alshanova «Konets sezona» fılmimen Sınemafondason baǵdarlamasynda baq synap otyr. Fılm sıýjetteri ár qıly: elimizdiń tarıhynan bastap búgingi problemalarǵa deıin qamtylǵan», - dedi Halyqaralyq «Eýrazııa» kınofestıvaliniń prezıdenti Aıman Musaqojaeva Kanndaǵy Qazaq mádenıeti keshinde.
71-shi Halyqaralyq aıtýly kınofestıvaldegi ulttyq pavılonnyń jumys isteýi elimizdiń kınoóndiretin el ekendigin dáleldep, halyqaralyq yntymaqtastyqty nyǵaıtýǵa jáne otandyq kınoóndirýshilerdiń sheteldik kompanııalarmen jumys isteý múmkindikterin arttyrady jáne elimizdiń ımıdjin kóteredi.
Osy oraıda aıta ketelik, byltyr Ulttyq Pavılonda kórmege qoıylǵan rejısser Erlan Nurmuhambetovtyń «Barymta» jobasy búginde «Qazaqfılm» kınostýdııasy men japonııalyq «Tokyo New Cinema» kınokompanııalarynyń qoldaýymen óndirilmek.
Sonymen qatar, Aıman Musaqojaeva Kann qalasynyń vıtse-meri Frank Chikli myrzamen kezdesip, eki el arasyndaǵy mádenı, onyń ishinde kınematografııa men týrızm salasyn nyǵaıtýdy kelisti.
«Búginde memleket tek áleýmettik mańyzdy jobalarǵa emes, sonymen qatar avtorlyq kınoǵa da qarjylyq qoldaý kórsetedi. Sonyń arqasynda qazaq kınosy qarqyndy damyp keledi. Máselen, otandyq «Qazaqfılm» kompanııasy 20-dan astam fılmdi jaryqqa shyǵarady, al jeke stýdııalar 30 fılm túsiredi. Qazirde otandyq kórermender qazaqstandyq kartınalardy kórýge yntaly. Elimizdegi kınoteatrlarda usynylǵan fılmderdiń 15% otandyq fılmder», - dedi QR Mádenıet jáne sport mınıstrliginiń ókili Almat Súıinov.
Kınorynokta ashylǵan barlyǵy 230 pavılon bolsa, sonyń qatarynda turǵan otandyq pavılon óz týyndylaryn deńgeıli usynyp otyr. Otandyq jańa fılmderdiń prezentatsııasynda treıleri kórsetilgen Asanáli Áshimov basty róldi somdaıtyn, rejısser Hýat Ahmetovtyń «Arýaq» kartınasy Kann kınofestıvaliniń qonaqtary, qalanyń basshylyǵy jáne festıvaldiń kınokomıssııasy erekshe qyzyǵýshylyq tanytty. Sondaı-aq, kórmege Bolat Qalymbetovtyń «Talan», Ermek Tursynovtyń «Kınomehanık», Djef Vespanyń «Ámire» jáne basqa da fılmderi qoıylǵan.
Esterińizge sala keteıik, buǵan deıin Kann kınofestıvaliniń «Erekshe kózqaras» baǵdarlamasynda elimizdiń kınematografısteri jeńimpaz atanǵan. 1998 jyly Dárejan Ómirbaev «Kıller» fılmimen jáne 2008 jyly Sergeı Dvortsevoı «Tıýlpan» fılmimen basty júldelerge ıe bolǵan.
Elimizden barǵan delegatsııa qatarynda memlekettik uıymdardyń ókilderi, shyǵarmashylyq ıntellegentsııa, Qazaqstan kınosy men televızııasynyń beldi azamattary jáne Qazaq ulttyq óner ýnıversıtetiniń stýdentteri bar.