Aıman Musaqojaeva kanadalyqtardy ónerimen tánti etti
«Stradıvarıdiń ǵajaıyp únin estý úshin saıasatkerler men iskerler, ǵylym men mádenıet qaıratkerleri, jýrnalıster, qazaqstandyq dıaspora ókilderi keldi. Atap aıtqanda, Aıman Musaqojaeva kontsertte I.Brams, L.Bethoven, J.Massne, K.Sen-Sans jáne basqa da kompozıtorlardyń álemdik klassıka týyndalaryn oryndady. Zaldyń biregeı akýstıkasy tyńdarmandarǵa qazaqstandyq prımanyń erekshe sheberligin tolyǵymen baǵalaýǵa múmkindik berdi»,- dep atap ótilgen QR Mádenıet jáne sport mınıstrligi baspasóz qyzmetiniń málimetinde.
Maestrony tanystyra otyryp, Qazaqstannyń Kanadadaǵy Elshisi Konstantın Jıgalov bul A.Musaqojaevanyń Kanada elindegi birinshi kontserti emestigin atap ótti. Aǵymdaǵy jyly sáýirde ol Kanada Syrtqy ister mınıstrliginiń ǵımaratynda bizdiń elder arasynda dıplomatııalyq qatynastar ornatylýynyń 25 jyldyǵyna oraı kontsert bergen bolatyn.
Qazaqstan men Kanada arasyndaǵy parlamentaralyq yntymaqtastyq tobynyń múshesi senator Vıktor Oý atap ótkendeı, ol A.Musaqojaevanyń sáýirde Ottavada ótken kontsertine bara almaǵan, sondyqtan Torontodaǵy kontsertke qatysý múmkindigine rızashylyǵyn bildirdi. Osy oraıda senator qazaqstandyq skrıpka sheberi Kanadaǵa kelesi jyly kúzde josparlanyp otyrǵan Qazaqstannyń mádenıet kúnderi aıasynda qaıta keletinine úmit artty.