Aıman Musaqojaeva Ierýsalım sımfonııalyq orkestriniń demeýimen óner kórsetti

ASTANA. QazAqparat - Ierýsalım teatrynyń sahnasynda Qazaqstannyń halyq ártisi Aıman Musaqojaeva  brazılııalyq tanymal dırıjer Djon Neshlıngtiń jetekshiligimen, Ierýsalım sımfonııalyq orkestriniń demeýimen kontsert qoıdy.

Bul jaıynda Qazaqstannyń Izraıldegi Elshiligi óziniń Feısbýktegi paraqshasynda jazdy, dep habarlaıdy QazAqparat.

Izraıl tyńdarmany qazaqstandyq birtýar óner ıesimen jaqsy tanys. Sondyqtan ony asyǵa kútken edi. Aıman Musaqojaevany zor qoshemetpen qarsy alǵan ızraıldik tyńdarman kontserttik baǵdarlama aıaqtalǵannan keıin de ony sahnadan uzaq ýaqyt boıy jibermedi.

Baǵdarlama aıasynda Musaqojaeva orkestrdiń demeýimen kompozıtor ıAn Sıbelıýstyń skrıpkaǵa arnalǵan kontsertin, Evgenıı Brýsılovskııdiń, Chaıkovskııdiń, Bethovenniń týyndylaryn oryndady.

Ierýsalım sımfonııalyq orkestriniń dırektory ıAır Shtern bul kontserttiń Qazaqstan men Izraıl arasyndaǵy dıplomatııalyq qarym-qatynastyń 25 jyldyǵyna arnalǵandyǵyn atap ótip, eki eldiń arasyndaǵy mádenı-gýmanıtarlyq yntymaqtastyqtyń odan ary damı túsetindigine senimdi ekendigin aıtty.

Aıman Musaqojaeva Izraılge sapary aıasynda Qazaq ulttyq óner ýnıversıtetiniń rektory retinde Ierýsalım mýzyka akademııasy men Aızek Stern atyndaǵy Ierýsalım mýzyka ortalyǵynyń basshylyǵymen kezdesýler ótkizdi.

Aıta keteıik, Aıman Musaqojaeva Qazaqstannyń halyq ártisi, "Álem ártisi", Halyqaralyq shyǵarmashylyq akademııasynyń akademıgi. Onyń  esimi mýzykalyq Olımpte M.Pletnev, G.Kremer, E.Grach, V.Tretıakov, I.Gavrsh sııaqty álem juldyzdarymen qatar tur. Óner juldyzy Shyǵys mýzykasynyń náziktigin, sezimtaldyǵyn Evropanyń mýzykalyq mádenıetiniń rýhanılyǵymen, kópqyrlyǵymen úndestirip, ulttyq ónerdi álem halqyna tanytty.