Aımaqtarǵa 4 642 tonna gýmanıtarlyq kómek jiberildi

<p>ASTANA. KAZINFORM &ndash; Aqtóbe, Qostanaı, Batys Qazaqstan, Abaı, Aqmola, Atyraý, Soltústik Qazaqstan oblystarynda sý tasqynyna qarsy is-sharalarǵa 35 000-nan astam volonter qatysyp jatyr. Bul týraly QR Mádenıet jáne aqparat mınıstrliginiń baspasóz qyzmeti habarlady.&nbsp;</p>

16 sáýirdegi jaǵdaı boıynsha sý tasqynynan zardap shekkenderge volonterler kómegimen 4642 tonna gýmanıtarlyq kómek jınaldy, onyń 3980 tonnasy zardap shekken aımaqtarǵa jetkizildi. 

Aqtóbe oblysynda 8600-den astam erikti jumyldyryldy. Volonterler kúshimen 10 000 adamǵa ystyq tamaq uıymdastyryldy.

Ulttyq volonterlik jelini, «Asar ýme» toby, «Ańsar», «Dáýletten qory» volonterlik qozǵalysynyń ókilderi jergilikti atqarýshy organdarmen birlesip Oıyl, Qobda aýdanynyń turǵyndaryna azyq-túlik pen kıim-keshek jetkizdi.

Evakýatsııalyq pýnktterge 174 tonna azyq-túlik, 65 tonna azyq-túlikke jatpaıtyn qajetti taýarlar jáne 200 kılogramm dári-dármek bólindi. 

Batys Qazaqstan oblysynyń sý basqan aımaqtarynda 7 myńnan astam volonter jumys isteıdi. «Birgemiz» Qorynyń qoldaýymen 300 qaıyq, 100 motopomp, 500 matrats, 100 shatyr, azyq-túlik satyp alyndy.

Qostanaı oblysynda 3000-ǵa jýyq erikti sý tasqynyna qarsy is-sharalarǵa belsendi qatysyp, halyqty evakýatsııalaýmen, gýmanıtarlyq kómek bólýmen aınalysýda. 

«Atyraý oblysynda volonterler shtaby shuǵyl rejımde jumys istep jatyr. Eriktiler men aýyl turǵyndarynyń bastamasymen arnaıy bógetter salyndy. Bógetterdi kúsheıtý úshin 30 myńnan astam qapqa qum toltyrylǵan. Qazirgi ýaqytta Atyraýda bógetterdi kúsheıtý úshin 107 pýnkt ornatyldy, bóget salý jumystary táýlik boıy jalǵaspaq. Aımaqta 500-ge jýyq arnaıy tehnıka jáne 9 myńǵa jýyq volonter jumys isteıdi. Ótken táýlikte 30 shaqyrym jerdi jaǵalaı bógetter kúsheıtildi», — delingen habarlamada.

Astanada áleýmettik qoımalarda gýmanıtarlyq kómek jınaýmen 30 volonterlik uıym aınalysyp jatyr. Jalpy 817 tonna gýmanıtarlyq kómek jınaldy.

Almatyda 20 iri volonterlik uıym 360 tonna kómek jınady. Kómek Oral, Aqtóbe, Atyraý, Qostanaı oblystary, Petropavl qalasyna jiberildi.