Aımaqtarda jastarǵa qatysty kózqarasty ózgertý kerek - Danııar Súndetbaev
«Negizi, Táýelsizdik jyldary ishinde Qazaqstanda úlken protsester júrdi. Osynyń arqasynda jańa urpaq, jańa býyn paıda boldy. Olar - ashyq oılaıtyn, óz oılaryn ashyq jetkizetin jastar. Meniń oıymsha, Jastar jyly bizge barlyq ıdeıalardy bildirip, barlyq ıgi bastamalardy iske asyrýǵa tarıhı múmkindik berip otyr. Osy oraıda jergilikti basqarý organdary tarapynan, mınıstrlikterdiń tarapynan jastarǵa qoldaý jasalady dep oılaımyn. Óıtkeni bıyl - Jastar jyly. Sondyqtan jastardyń batyl ıdeıalaryn iske asyrýǵa qarsylyq bolmaıtyn shyǵar», - dedi D.Súndetbaev QazAqparat tilshisine bergen suhbatynda.
Onyń aıtýynsha, búginde qoǵam ishinde, ásirese, jergilikti jerde jastarǵa qatysty burynǵy keńestik kózqaras áli de bar. Ony ózgertý kerek. Áıtpese, jastardyń batyl ári tıimdi bastamalary iske aspaı qalýy ábden múmkin. «Jastar keıinirek, sizderdiń ýaqyttaryńyz áli kelgen joq degen sııaqty psıhologııa áli de bar. Ásirese, aımaqtarda ondaı psıhologııa anyq baıqalyp jatady. Ýnıversıtetterde de bar. Sizder jassyzdar, keıinirek jasaısyzdar, áli ýaqyttaryńyz bar deıdi. Al Elbasy Nursultan Nazarbaev basqasha aıtyp otyr. Jastardyń ýaqyty keldi, jastar erteń emes, búgin jasaýy qajet deıdi. Osylaısha, Prezıdent bizge myqty messendj berip tur. Sebebi qazirgi ómir ózgerdi. Qysqa ýaqyttyń ishinde biraz ózgerister bolyp jatyr. 20 jyldan keıin búgingi jastar basqasha bolady. Sondyqtan qazirden bastap jasaý qajet, qazirden bastap úlken jobalardy iske asyrý kerek. Jastardy áriptes retinde qarastyrý qajet», - dep atap kórsetti D.Súndetbaev.